Vise MEJD Rekomenda Centro Chega! Trasmite Memória Pasadu ba Jerasaun Foun

28

Dili, (09 Maiu 2022) – Vise Ministru Edukasaun Juventude no Desportu (MEJD), Antonio Guterres rekomenda ba Centro Nacional Chega!I.P no Komite Orientador 25 (CO25 Sigla Portugés) atu trasmite memória pasadu ba jerasaun foun liuhosi semináriu no refleksaun nasionál atu sira aprende.

Tanba liuhosi semináriu no refleksaun nasionál ne’e Autór, Sasin no Peskizadór sira bele fahe hanoin no esperensia pasadu kona-ba prosesu luta ukun-an nian ba joven no labarik sira bele prende ho di’ak hodi hatan ba objetivu prinsipal mak atu promove transmisaun memória no istória ba jerasaun foun.

“Hau hakarak kongratula Centro Chega! no CO25 ne’ebé ho esfórsu tomak realiza ona eventu refleksaun ida ne’e ho susesu no kontinua ita boot sira nia sevisu di’ak”, kongratula hosi Vise MEJD iha serimónia abertura semináriu no refleksaun nasionál ho tema “Hanoin Hikas 10 Juñu 1980”  ne’ebé realiza iha salaun konferensia Centro Chega! Antugu Comarca Balide-Dili.

Nia mós rekomenda tan ba Centro Chega no CO25 atu promove sasin sira hatuir memória no istória pesoál no koletivu kona-ba esperensia luta rezisténsia liuhosi refleksaun no re-interpreta esensia hosi eventu ba konstrusaun sosiedade foun iha era independénsia.

Vise MEJD konsidera servisu Centro Chega!I.P no CO25 ne’e di’ak no importante tebes tanba organiza no fahe matenek ba juventude Timor oan sira. Halo refleksaun kona-ba nasaun Timor-Leste nia istória sira liuhosi peskiza atu ita bele kompriende eventu istóriku sira ne’ebé mak akontese durante prosesu ukun-an.

Centro Chega! no CO25 mós atu hakerek istória ukun rasik-an atu sai hanesan dalan ida efetivu ba prezervasaun ba identidade pais Timor-Leste nian ho dalan ne’ebé sustentavel tanba ita bele hatutan hanoin sira infórmasaun no eventu istóriku sira kona-ba rezisténsia inklui levantamentu Marabia.

Liuhosi hakerek istória sira ne’e, Timor oan sira bele hekerek tanba ida ne’e importante tebes atu kontinua promove esfórsu sira kona-ba peskiza no hakerek kona-ba eventu istóriku sira. Bainhira ita hakerek ona ita nia istória sira kona-ba ukun rasik-an ita bele ona asegura jerasaun sira tuir mai atu hatene istória ne’ebé loos.

Labarik sira bele ona aprende ho lolos akontesimentu istóriku sira ne’e nu’udar dalan ida atu hariku ita nia identidade nu’udar nasaun. Dalan prezervasaun sira seluk mak katak ita nia istória sira ne’eb’e ita hakerek bele hatama ona iha kurikulum aprendisajen nian atu fó dalan ba labarik sira atu aprende ida ne’ebé sei asegura ita nia oan sira bele aprende ita nia istória ho di’ak liu-tan.

Asegura mós aprendisajen iha kurikulum ne’ebé tuir istória sira rezisténsia nian, sei ajuda labrik sira pro-ativu liu-tan hodi promove paz iha sosiedade. Livru mak rekursu ba koñesimentu jerasaun sira ne’ebé lainvolve direita bele lee istória sira hanesan ne’e.

Komprinde no prezerva pensamentu istóriku sira ne’e ba ema seluk nune’e importante atu hatama Timor-Leste nia istória iha konteúdu kurkulular nian atu fasilita labarik sira bele aprende ita nia istória ho sistematiku.

Tanba ne’e importante ba ita atu eduka ita nia oan no juventude sira kona-ba eventu istóriku atu sai maduru liu-tan, halo ita nia juventude sira sai analitiku liu-tan, hanoin nasionál liu-tan nune’e ita nia pais Timor-Leste sai pais ida fórte liu.

Hatama eventu istóriku sira ba konteúdu kurikular mak esfórsu ida atu hametin no hariku ita nia pensamentu liuhosi valor kultura no istóriku sira liuhosi edukasaun. Tanba uluk funu ita uza kilar, ohin loron ita nia funu mak atu dezenvolve nasaun ho paz no armonia no trankuilidade ba ita nia povu no halakon justisa social.

Harmonia no trankuilidade ba ita nia povu mak liuhosi fó rekoñesimentu ba ita nia istória rasik. Rekoñesimentu istória mak nu’udar respeitu di’ak ba partisipasaun hosi sobrevivente sira ba eventu levantamentu Marabia.  Ho ida ne’e mak ita kontoribui ba halo progresu di’ak ba ita nia dezenvolvimentu.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X