UNPAZ Rekomenda Centro Chega! Kontinua Disemina Informasaun Arkivu

78

Dili – Universidade da Paz (UNPAZ) rekomenda ba Centro Nacional Chega!I.P atu kontinua nafatin halo atividade diseminasaun informasaun kona-ba asuntu arkivu ba estudante sira iha UNPAZ tanba estudante barak mak seidauk iha koñesimentu kona-ba importansia hosi arkivu.

Reprezentate Reitór UNPAZ, Luis Cardoso informa, Centro Chega! iha papél importante halo diseminasaun informasaun kona-ba arkivu tanba Centro Chega! mak halo prezervasaun ba dokumentus istóriku kona-ba prosesu luta ba ukun rasik-an.

“Hau rekomenda ba Centro Chega! atu kontinua fó seminariu ba estudante sira kona-ba arkivu, atu nune’e estudante sira bele hatene tanba estudante barak mak seiduak iha koñesimentu”, dehan Reprezentante Reitór UNPAZ iha diskursu abertura semináriu ne’ebé realiza iha kampus UNPAZ, Osindo-Dili, Sexta-feira (29/04/2022).

UNPAZ no Centro Chega! hanesan parseiru importante no durante ne’e UNPAZ halo ona kooperasaun ho Centro Chega! hanesan liuhosi peskiza kona-ba komunidade ida istória ida nomós hanorin ona materia justisa tranzitoriu ba estudante sira iha UNPAZ.

Rezultadu hosi atividade ne’e, ba futuru ita sei halo-tan atividade semináriu kona-ba arkivu foku liu ba estudante sira bele hatene no halo peskiza ba fatin istoriku, depois hakerek no rai hela istória ba jerasaun foun sira tuir ma.

 Vise Diretór Centro Linguistika-UNPAZ, Silvestre de Oliveira konsidera atividade semináriu ne’e importante tebes tanba bele loke estudante sira nia hanoin kona-ba importansia hosi arkivu dokumentus istóriku kona-ba prosesu luta ba ukun rasik-an.

“Hau haree atividade ida ne’e kapas los, tanba loke hanoin joven sira nian no sira nudar futuru profisionais atu dezenvolve ita nia nasaun ne’e. Sira nudar Timoroan tenke hatene istória no kultura”, nia apresia.

Enkuantu, Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X