Sobrevivente Rekomenda Governu Tau Matan ba Familia Vitima Masakre Nikir

71

Covalima – Sobrevivente, Miguel Armada Cardoso rekomenda ba estadu no governu Timor-Leste atu tau matan ba familia vitima hosi masakre Nikir-Hatu-metan, Suku Beiseuk, Postu Administrativu Munisipiu Covalima.

Tuir Miguel, tanba familia vitima barak mak moris iha kondisaun uma ladi’ak nomós oan sira remata de’it eskola iha nivel Sekundariu lakontinua estudu ba universidade tanba sira laiha kbiit finanseiru hodi dudu oan sira ba iha universidade.

“Estadu no governu bele karik, hari’i netik uma kbiit la’ek ba sira nomós tau matan ba sira nia oan ne’ebé mak ho idade sei estudu”, dehan Miguel ba Media Chega! hafoin remata komemorasaun masakre Nikir-Hatu-metan, Suku Beiseuk, Sexta-feira (23/04/2022).

Maske, Governu liuhosi Centro Nacional Chega!I.P halo ona komemorasaun ba masakre Nikir-Hatu-metan, maibé familia vitima seidauk hetan atensaun hosi Governu.

“Ami orgullu, ami kontente tebes, ohin loron konsege realiza komemorasaun ba masakre ne’e, ami hato’o agradese wain”, nia agradese.

Miguel hanesan mós veteranu ida, iha esperansa katak ba futuru, estadu no governu liuhosi Centro Chega! bele hakerek istória kona-ba masakre Nikir-Hatu-metan.

“Ami nia esperansa katak, ba futuru Centro Chega! bele hakerek inan aman, tiun no avo sira nia istória luta ida ne’e. Atu istória ne’e labele lakon no istória ne’e kontinua hatutan ba ami nia oan no beioan sira iha baliza ida ne’e”, Veteranu Miguel garante.

Masakre Nikir-Hatu-metan, Suku Beiseuk, Postu Administrativu Tilomar, Munisipiu Covalima akontente iha loron 23 Abril 1999. Milisia Pro-integrasaun Laksauk hamutuk ho miliar Indonézia sira oho ema na’in lima (5) mak hanesan; – Aleixo Ximenes, Tomas Cardoso, Paulos Ximenes, Ludufiku Rabu, Bendito do Nacimento.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X