Sítiu Istóriku Toko Lay

102

Toko Lau nu’udar Sítiu Istóriku ida tanba iha loron 7 Dezembru 1975, iha dadersan Tropa Indonézia sira hakbesik-an ba Edifisiu Toko Lay ne’ebé lokaliza iha Rua José Maria Marques. Momentu ne’ebá Tropa Indonézia sira haruka ema sira ne’ebé hela iha Toko Lay nia laran hodi sai hotu ba liur. Númeru ema ne’ebé hela iha fatin ne’e kuaze ema na’in 20, ne’ebé maioria hosi étniku Xinés.

Bainhira haruka ema sira ne’e sai ba li’ur, Tropa Indonézia sira tiru mate kedan Tsam Yi Tin no tiru kanek nia oan mane ho naran Tsam Meu Tang. HafoinTropa Indonézia sira lori ema na’in 16 kompostu hosi mane de’it la’o ba área portu ni’an, enkuantu feto ho labarik, sira haruka ba hotu iha eskola Xina nian iha Bairu Sentral. Grupu hosi mane na’in 16 ne’e, Tropa Indonézia sira obriga ke’e rai kuak iha jardin portu nia oin ne’ebé ikus mai hodi hakoi Tropa Indonézia sira ne’ebé mate tanba tiru malu ho Forsa Falintil – FRETILIN nian.

Loron tuir mai, iha 8 Dezembru 1975, iha lokraik kuaze tuku 16:00 resin, Tropa Indonézia sira oho tiha ema na’in 13 hosi ema na’in 16 ne’ebé sira haruka ke’e kuak iha Postu Dili nian oin, no husik de’it ema na’in tolu mak fila fali ba sira nia hela fatin.

Ema na’in 13 ne’ebé tropa Indonézia sira oho mak hanesan: Lay Pin Leung, Lay Siu Xian- Assio (idade tinan 19), Lay Siu Chang (idade tinan 30, oan hosi Lay Pin Leung), Lay Su Chean (idade tinan 25) hosi Aileu, Chung Tjeo Ching (idade tinan 40) hosi Liquiça, Lay Mi Fon (idade tinan 40) nu’udar sofer iha Toko Lay.  Lay Kian Pau (estudante ho idade tinan 17), Leung Yung Fa (A Fa Qi) (idade tinan 19), Lay Su Po nu’udar seguransa iha Loja (idade tinan 18), Lay To Su hosi Suai, Lay Tin Chang seguransa Loja nian (idade tinan 22) hosi Bobonaro, Yong Tsoi Sin, Lay Tso In (estudante ho idade tinan 17).




Leave a Reply

Your email address will not be published. Required fields are marked *

error: Alert: Chega! Area Protejidu!
X