Semináriu no Refleksaun Nasionál ho Tema “Hanoin Hikas 10 Juñu 1980” Atu Hametin Memória Pasadu

30

Semináriu no Refleksaun Nasionál ho Tema “Hanoin Hikas 10 Juñu 1980” Atu Hametin Memória Pasadu

Dili, (09 Juñu 2022) – Centro Nacional Chega!I.P servisu hamutuk ho Komite Orientadór 25 (CO25 Sigla Portugés) realiza semináriu no refleksaun nasionál ho tema “Hanoin Hikas 10 Juñu 1980” objetivu atu komemora loron lavantamentu Marabia no hametin memória pasadu luta povu Timor-Leste nian ba ukun rasik-an.

Semináriu no refleksaun nasionál ne’e abertura hosi Vise Ministru Edukasaun Juventude no Desportu (MEJD), Antonio Guterres, lian makloke hosi Diretór Ezekutivu Centro Chega!, Hugo Maria Fernandes no Prezidente Komite Orientadór 25, Constancio Pinto “Terus”.

Alende iha mós lansamentu livru rua; – Ida, ho titulu “Hau Nia Dalan Ba Libertasaun” hakerek hosi saudoso Alberto da Costa “Bua” no – Rua,  “A Minha Memória” hakerek hosi Aurora Assunção Quintão ne’ebé halo lansamentu hosi Vise Ministru Edukasaun Juventude no Desportu (MESJD), Antonio Guterres.

Hafoin remata kontinua kedan ho aprezentasaun tematiku no diskusaun kona-ba akontesimentu 10 Juñu 1980. Aprezentasaun dahuluk hahú kedas hosi grupu ligasaun ne’ebé konta hosi Luzia da Costa, João Mota, Madalena Bidau Soares “Kasian”. Aprezentasaun daruak instala rede konta hosi Tereza Carvalho no Lorenço da Conceição no tuir mak asaltu konta hosi Lagarto, João Piedade “Lasiu”, Moises de Fatima no seluk tan.

Diretór Ezekutivu Centro Chega!, Hugo Maria Fernandes informa, ohin ita halo semináriu ida foku refleksaun nasionál kona-ba akontesimentu levantamentu Marabia hodi hatudu ba mundu internasional katak rezisténsia kontinua eziste no luta nafatin.

No levantamentu Marabia ne’e mós hatudu ba ema hotu katak luta ne’e luta popular tanba akontese levantamentu ne’e ema ne’ebé laho kilat mós kontribui luta ba akontesimentu levantamentu Marabia ida ne’e.

“Tanba luta ema hotu nian mak levantamentu sira hanesan ne’e bele akontese”, dehan Diretór Ezekutivu Hugo iha semináriu no refleksaun nasionál ne’ebé realiza iha salaun konferensia Centro Chega! Antigu Comarca Balide-Dili.

Entaun, semináriu no refleksaun nasionál ne’e realiza tanba Centro Chega! parseria ho Komite Orientadór 25 no hosi eventu ne’e ita bele hahu hametin ita nia memória sira atu hametin liu-tan ita nia identidade.

Prezidente Komite Orientador 25, Constancio Pinto reforsa, seminariu no refleksaun nasionál ne’e halo tanba atu komemora 10 Juñu levantamentu Marabia tanba levantamentu Marabia nu’udar akontesimentu istóriku ida ba ita nia luta.

“Hau hanoin sermináriu ne’e importante tebes no liuhosi semináriu no refleksaun ne’e halo klean liu tan. Komite Orientador hetan knaar ida hodi hakerek istória akontesimentu ne’e, no hola parte ba peskiza Komite Orientador 25 nian”, esplika nia.

Nia subliña katak, liuhosi semináriu no reflekasaun ida ne’e, atu fó hanoin ba ita atu ita bele dignifika no fó ondra ba ita nia maluk sira ne’ebé mak sai vitima tanba akontesimentu ne’e.

Enkuantu semináriu no refleksaun nasionál ne’e partisipa hosi Vise Prezidente Parlamentu Nacional (PN), Maria Angelina Lopes Sarmento, Prezidente Komisaun Funsaun Publika (PKFP), Faustino Cardoso Gomes, Sobrevivente, Veteranus, Estudante Universitáriu, Organizasaun Sosiedade Sivil no Instituisaun Governu sira ho totál ema na’in 100 resin.

Vise Ministru Edukasaun Juventude no Desportu (MEJD), Antonio Guterres kongratula servisu Centro Nacional Chega!I.P no Komite Orientador 25 tanba organiza ona semináriu no refleksaun nasionál ho tema “Hanoin Hikas 10 Juñu 1980” hodi komemora loron levantamentu Marabia.

“Hau hakarak kongratula Centro Chega! no Komite Orientador 25 (CO25 Sigla Portugés) ne’ebé ho esforsu tomak realiza ona eventu refleksaun ida ne’e ho susesu no kontinua ita boot sira nia sevisu di’ak”, nia agradese.

Servisu Centro Nacional Chega!I.P no Komite Orientador 25 ne’e di’ak no importante tebes tanba organiza no fahe matenek ba labarik no juventude Timor oan sira. Halo refleksaun kona-ba nasaun Timor-Leste nia istória sira liuhosi peskiza atu ita bele kompriende eventu istóriku sira ne’ebé mak akontese durante prosesu ukun rasik-an ho di’ak liu-tan.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X