“SAPATU KASOGI” – Memória Duarte Pereira

90

Duarte Pereira – Juventude Lorico Aswa’in, Sobrevivente 12 Novembru.

(Hakerek nain: DINO HANJAM).

Se nia rona nia maun Paul, nia sei la ba tanba nia maun mehi aat ona horikalan, maibé rai ne’e konvida nia, unidade nasionál bolu nia atu sai kadalak hodi sulin ba wee lihun ida de’it iha loron ne’e.
“Diak ka aat, mate ka moris ha’u tenke ba maun”.
Liafuan ne’e mak nia hatan ba nia maun iha momentu ne’ebá, tanba loron ne’e juventude ne’ebé fó fuan ba rai ida ne’e deside ona atu tuun dala ida de’it.

Antes ne’e nia fase moos kedas nia sapatu ‘Kasogi’ ne’ebé mak nia gosta. Nia haris hotu sunu tiha lilin iha ortóriu, hafoin atu ba foti sapatu hatais. Sapatu laiha ona iha fatin, nia hatene maun foti ona sapatu ba subar.
Wainhira nia maun baku ba nia kabaas hodi dehan, “Tau matan ba alin sira no kontinua luta ne’e nu’udar Juventude Lorico Aswa’in se wainhira ha’u la fila”. Ko’alia hotu nia maun sai ba dadauk, nia hamriik ho ain tanan doko ulun de’it hatudu oin hamnasa.

Iha misa klaran antes sirene toa lian husi mane nurak porta vos Filipe Rodrigues Pereira, nia maun hetan kedas nia hakat mai oin, nia maun hateke ba nia ho oin duvida, nia maun hakbesik ba,
“Sapatu o hetan iha ne’ebé?”
“Maun sai ba li’ur la kleur ha’u rona uma leten tarutu”
“Hmmm.., haree ba komunga”
Nia maun ko’alia hodi baku ba nia kabaas. Nia hateke ba maun ho oin kontente, hafoin nia hakat ba oin simu kominaun. Maibé nia la fila mai fatin to’o misa ramata.

Sirene toa lian dadauk, juventude sira hahú haklalak “Viva Sebastião, Viva Timor-Leste, Viva Unidade Nacional”.
“Iha ne’e ha’u la haree ona nia oin, e ha’u mós haluha ona mehi horikalan ne’e atu akontese saida…, iha ha’u nia hanoin mak mundu sei hadeer loke matan iha loron aban…”
Nia maun haktuir istória ikus hamutuk ho alin doben ne’e ho oin hamnasa, maibé matawen uituan iha nia matan…

Duarte Pereira Lahane, lakon iha Masakre Santa Cruz 1991.

Viva Unidade Nacional
Viva Juventude Lorico Aswa’in
Viva Timor-Leste




Leave a Reply

Your email address will not be published. Required fields are marked *

error: Alert: Chega! Area Protejidu!
X