Rekonsiliasaun hanesan Programa Moris no Labele Sai Projeitu De’it

46

Dili, Centro Nacional Chega!I.P realiza Talk Show ida iha Radio Televizaun Timor-Leste (RTTL. Ep) iha loron 12 Agostu 2021, liu husi programa Chega! Ba Esperansa ho tema “Promove no Haburas Rekonsiliasaun”, ho objetivu introdúz mekanizmu rekonsiliasaun komunitária bazeia ba kultura lokál no matenek lokál, nune’e mós Esperiénsia Dame no Rekonsiliasaun Timor-Leste nu’udar Lisaun ba Nasaun Membru g7+.

Orador ba Talk Show ne’e mak, Membru Konsellu Administrasaun Centro Chega! ne’ebé hanesan mós Eis Komisairu CAVR no CVA Pe. Jovito do Rego ne’ebé ko’alia kona-ba konseitu rekonsiliasaun Timor-Leste uza durante mandatu CAVR.

Tuir Pe. Juvito, rekonsiliasaun hanesan programa moris nian no nunka remata iha ema nia moris. Tanba finalidade husi rekonsiliasaun ne’e mak moris di’ak, moris hakmatenk iha prosesu dezenvolvimentu nasionál.

Oradór seluk mak Diretór Ezekutivu Centro Nacional Chega! Hugo Maria Fernandes, ne’ebé ko’alia kona-ba mandatu Centro Chega! nian ho programa sira hodi kontinua promove rekonsiliasaun.

Tuir Hugo Maria Fernandes, rekonsiliasaun ne’e hanesan prosesu ida ne’ebé tenke ko’alia sai kona-ba lia loos, simu lia loos no tuur hamutuk. Ba ida ne’e, Centro Chega! nia mandatu prinsipál mak atu apoiu inisiativa rekonsiliasaun ne’ebé hatúr iha programa prioridade oitavu governu konstitusional katak tenke halo promosaun, rekonsiliasaun husi nivel nasionál no internasionál.

Enkuantu, Tékniku Espesialidade iha Sekretariadu g7+, Felix Piedade ko’alia kona-ba Esperiénsia Dame no Rekonsiliasaun iha Timor-Leste sai Lisaun ba Nasaun Membru g7+.

Tuir Felix Piedade, durante ne’e Timor-Leste fahe nia esperiénsia kona-ba rekonsiliasaun internal entre Timoroan ho Timoroan no externalmente Timor-Leste ho Indonézia ba nasaun membru g7+ nian ne’ebé mak oras ne’e sei konflitu hela ho nasaun viziñu sira.

Iha tempu hanesan, Jestór Programa Atensaun no Responde Sedu (AtReS) husi ONG BELUN, Romaldo Caetano ko’alia kona-ba papel no programa ONG Belun nian hodi promove dame no rekonsiliasaun.

Nia esplika, ONG Belun nia servisu durante ne’e mak halo monotorizasaun ba insidente/violensia ne’ebé akontese iha rai laran, hafoin entrega ba parte relevante sira hodi rezolve ka hamutuk ho autoridade lokál sira iha nivel Postu Administrativu no Suku hodi halo prevensaun liu husi dalan di’alogu, Nahe Biti Boot, Semináriu no Atividade Rekondiliasaun.




Leave a Reply

Your email address will not be published. Required fields are marked *

error: Alert: Chega! Area Protejidu!
X