Prizaun Estufa – Munisípiu Ermera

91

Sitíu Istóriku Prizaun Estufa Abat lokaliza iha Aldeia Matanova, Suku Fatubessi, Postu Administrativu Hatulia, Munisípiu Ermera (Atuál – Komunidade mak Okupa).

Prizaun Estufa sai hanesan fatin detensaun úniku iha Ermera, no fatin ne’e uluk Portugés sira harii hodi sona boraixa-been (getah Karet), maibé iha tinan 1976, Fretilin hahú uza fatin ne’e hanesan prizaun ka fatin detensaun ba ema sira ne’ebé deskonfia traidór ka kontra orden funu nian, no mós detein simpatizante no militante UDT no APODETI sira. Iha fulan Outubru 1976, komesa iha konflitu entre Lider Fretilin sira husi Kuadru Sivíl no Militár, tanba diferensia hanoin, nune’e hamosu kedas konflitu armadu iha fatin ne’e no ikus mai Xefe Estadu Falintil José da Silva ho nia grupu hamutuk ema na’in 62 hetan kapturasaun no detein iha fatin ne’e.

Fatin detensaun ne’e ho medida kloot tebes, nakukun, laiha ventilasaun no natoon de’it hodi detein ema na’in haat (4), ne’e mós sira tenke tuur ho ain selok-malu (kaki terlipat), nune’e difisíl tebes ba detidu sira atu dada iis. Durasaun tempu detensaun ba detidu sira iha fatin ne’e hahú husi semana ida to’o fulan rua.

Forma tortura ne’ebé akontese iha fatin detensaun ne’e mak hanesan: Hakoi detidu sira nia isin sorin hafoin sunu plástiku halo nabeen hodi fui ba sira nia isin-lolon no dala ruma detidu sira loron tomak la hetan hahán.

Kuadru Sivíl no Militár husi Fretilin nian ne’ebé detein iha fatin ne’e hafoin konflitu interna Fretilin nian mak: Xefe Estadu Falintil José da Silva, Komandante Seitór Fronteira Norte Martinho Soares, Komandante Seitór Fronteira Súl Agustinho Espirito Santo, Celestino Alves (sei moris), José Soares, José Carvalho, Cornelio Soares, Alberto Babo, Afonso Araújo, Manuel Alves, Aparicio, Belarmino Alves, Bosco Araújo,  Domingas Madeira , Jerónimo Albino da Silva inklui detidu na’in 57 ne’ebé leál ba Grupu Xefe Estadu Falintil nian. Husi númeru detidu ne’e, ema na’in 40 mak mate tanba oho husi Membru Fretilin ne’ebé leál ba Komisáriu Polítiku Seitór Fronteira Norte no detidu balun seluk mate tanba hamlaha no moras.




2 thoughts on “Prizaun Estufa – Munisípiu Ermera

  1. AvatarNolasco Mendes

    Prizoneiru sira laos Mate iha Prizaun Estufa maibe lori fali ba iha Prizaun Sabasoi (Besik Estufa) mak tiru mate iha ne’eba…iha Estufa ne’e kesi, baku, tuku, tebe no sunu isin lolon.

    Resposta

Leave a Reply

Your email address will not be published. Required fields are marked *

error: Alert: Chega! Area Protejidu!
X