Hugo Maria Fernandes

Prevene Inundasaun, Centro Chega! Planeia Konstrui Drainazen

64

Atu evita inundasaun mak lori estragus ba edifisiu, arquivu istoriku, no dokumentus sira seluk, Centro Chega! planeia atu konstrui drainazen, taka portaun tuan no halo portaun foun.

Desizaun ida neé toma iha enkontru extraordinariu ente Director Executivo, Hugo Maria Fernandes ho dirijentes Centro Chega! sira seluk, Tersa-feira (17/03/20) semana neé iha Salaun Ekontru Centro Chega!, Balide, Dili, Timor-Leste.

“Hare ba inundasaun foin lalais, neébe lori estragus lubuk ida, ita konkorda atu halo sistema drainazen iha areadores Centro Chega!, nomos taka portaun tuan no halo fali portaun foun iha oin,” komenta Hugo Fernandes.

Ba oin, ita sei hakerek relatoriu kompletu konaba inundasaun no estragus hirak neébe akontese iha loron hirak liu ba, hatoó ba Primeiru Ministru, inklui rekomendasaun sira hodi prevene estragus bot liu tan iha loron-oin, Hugo hatutan.

Iha enkontru refere koalia mos konaba atu hari Centro Arquivu hodi asegura dokumentasaun istoriku sira, mak hanesan dokumentus, videos, audio, no fotografia. Centro Arquivu neé kompostu hosi armazen hodi rai dokumentasaun istoriku, biblioteka hodi asesu arquivu istoriku dijitalmente, eskritoriu ba funsionarius Divizaun Pesquiza no Dokumentasaun Istoriku (DPAI), nomos Server Room hodi rai no asegura arquivu dijitalizadu.

Enkontru neé, alem Director Executivo marka prezensa mos dirijentis sira seluk, hanesan Director Finansas no Operasional Metodio Caetano Moniz, Director Edukasaun no Formasaun Vicente Borges Maia, Directora Dezenvolvimentu Institusional no Rekursus Umanus Maria Arminda G. da Costa, Pesquizador Nolasco Mendes, Xefe Departamentu Solidariedade ba Sobreviventes Chiquito da Costa, Xefe Departamentu Finansas Ligia Hermenegildo da Costa, no funsionariu pertinente sira seluk.* (MC. Moniz | CHEGA.TL | 17.03.2020).




Leave a Reply

Your email address will not be published. Required fields are marked *

error: Alert: Chega! Area Protejidu!
X