Polres Díli/Pusat Budaya Indonesia – Munisípiu Dili

56

Sítiu Istóriku Polres Díli (Kepolisia Resor Dili) lokaliza iha Avenida Bispo de Madeiros (agora harii ona Pusat Budaya Indonézia), no iha tempu kolonializmu Portugés fatin ne’e nu’udar Kuartel Polísia Portugés nian. Bainhira akontese konflitu polítiku interna iha 1975, iha loron 11 Agostu 1975,  membru Partidu Polítiku UDT sira hadau Kuartel ne’e no kaptura Tanente Koronel Rui Magiolo Gouveia ne’ebé komanda polísia sira iha kuartel ne’e. Alende ne’e, membru hosi UDT sira mós hadau hotu kilat ne’ebé rai iha fatin ne’e no hahú domina kedas fatin importante no estratéjiku sira iha Díli laran no mós kaptura simpatizante, militante no lider Fretilin sira hodi ba detein iha Kaserna Palapasu (Cede UDT). Asaun ne’e nu’udar inisiu konflitu armada entre UDT ho Fretilin no lori prosesu ba asina deklarasaun integrasaun iha Bali no Invasaun boot Indonézia iha loron 7 Dezembru 1975.

Iha tempu okupasaun Indonézia, fatin ne’e kontinua sai Kuartel Polísia Indonézia nian (Kuartel Polres Díli). Fatin ne’e dala barak Polísia sira uza hodi detein no halo tortura ba joventude Timoroan sira ne’ebé luta ba ukun rasik-an. Maneira tortura sira ne’ebé polísia sira uza iha fatin ne’e mak polísia sira uza lamina hodi ko’a prizioneiru/detidu sira nia isin, baku no tuku prizioneiru/detidu sira.

Insidente ida ne’ebé iha ligasaun maka’as ho fatin ne’e mak akontesimentu iha fulan Dezembru 1996, bainhira Amo Bispu Don Carlos Filipe Ximenes Belo fila mai Timor hafoin simu tiha Premiu Nobel da Paz hamutuk ho Dr. José Ramos Horta, nune’e juventude Timoroan sira halo selebrasaun ida iha Díli no durante selebrasaun ne’e mak akontese konfrontu entre juventude Timoroan sira ho Intel Indonézia nian, no ikus rezulta Intel Timoroan Alfredo Sigamau mate tanba juventude sira deskonfia Alfredo iha intensaun atu oho Amu Bispu Belo. Nu’udar resposta ba insidente ne’e, Militár ho Polísia Indonézia halo kapturasaun ba juventude sira hodi ba detein iha Polres Díli. Durante detein iha Polres Díli, Polísia sira uza lamina hodi ko’a detidu sira nia isin to’o ran.  




Leave a Reply

Your email address will not be published. Required fields are marked *

error: Alert: Chega! Area Protejidu!
X