PM Taur: “Ha’u Kontente Loos Inagura Uma ne’ebé Centro Chega! Halo”

90

Liquiça, Primeiru-Ministru Repúblika Demokrátika Timor-Leste Taur Matan Ruak sente kontente halo inagurasaun uma husi “Memória ba Esperansa” ne’ebé halo husi Centro Nacional Chega!I.P (CNC I.P) no oferese ba Sobrevivente Domingos dos Santos iha Suku Vatuvou, Postu Administrativu Maubara, Munisípiu Liquiça.

Tanba uma ne’ebé Centro Chega! halo simples, maibé ho nia sibilizmu boot, manifesta espiritu solidariedade ne’ebé Centro Chega! iha ba ita nia inan, aman no alin sira.

“Ha’u kontente loos, primeira ves ha’u partisipa iha inagurasaun projetu ne’ebé Centro Chega! halo hodi oferese ba maun Domingos”, dehan PM Taur iha serimonia inagurasaun uma husi Memória ba Esperansa ne’ebé halo husi Centro Chega! no implementa husi Asosiasaun Vítima Konflitu Polítiku 1974-1999, iha Vatuvou, Liquiça, Kuarta-feira, (12 /01/2022).

PM Taur dehan, “Ita nia prinsipiu mak lori oituan halo barak i la’os lori barak halo oituan. Kuandu ita lori barak halo oituan ne’e signifika ita halo esvanzamentu ba ita nia rekursu, maibé kuandu lori oituan halo barak ne’e signifika ita halo poupansa”.

Entretantu, Diretór Ezekutivu Centro Chega! Hugo Maria Fernandes informa, uma ne’ebé Centro Nacional Chega!I.P oferese ba sobrevivente Domingos dos Santos ho medida 9×7, kompostu husi, Kuartu 3, sala 1, haris fatin 1, varanda 1 no mos dapur, kompleta ho instalasaun eletrisidade, plafon no keramik, exeptu dapur mak la uza keramik ho totál kustu $ 14.800 inklui ona selu badae.

Uma “Da Memória À Esperança” nu’udar parte ida husi implementasaun Mandatu Centro Chega! nian tuir Dekretu Lei 48/2016 mak atu tau-matan no apoiu Sobrevivente sira husi Violasaun Direitu Umanu ne’ebé akontese iha periodu1974-1999. Nune’e mos nu’udar programa prioridade Governu Konstitusional Oitavu nian ne’ebé hatur iha Centro Chega! nia responsabilidade atu fó tulun ba prezervasaun memória pasadu sira no kontinua promove direitu umanu no rekonsiliasaun.

Xefe Suku Vatuvou Gabriela da Costa Pereira hateten, sobrevivente Domingos merese duni hetan atensaun husi estadu liu-liu governu liu husi Centro Chega! tanba nia mos uluk fó nia kontribuisaun ba luta ukun rasik-an no ohin loron nia hetan moras saúde. Nia mos husu ba Centro Chega! atu halo identifikasaun nafatin ba sobrevivente sira seluk ne’ebé seidauk hetan.

Enkuantu Sobrevivente, Domingos dos Santos dehan, “Ha’u kontente tanba halo ha’u nia uma ida di’ak ona. Hau nia uma ida uluk ne’e aat, ha’u nia uma uluk didin ho kalen aat ne’ebé foti iha 1999 ema sunu, ne’e mak ami foti didin, depois hela. CNC mai halo uma ida ne’e, ha’u agradese ba CNC”.

Iha tinan 2021, Centro Nacional Chega! servisu hamutuk ho Asosiasaun Vitima Konflitu Pasadu harii Uma “Da Memoria A Esperansa” hamutuk 10 ba Sobrevivente sira ne’ebe vuneravel liu.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X