Papél Centro Chega! Importante ba Prezervasaun Memória Pasadu

67

Dili – (Kinta-feira, 19 Maiu 2022), Centro Nacional Chega!I.P lidera hosi Diretór Ezekutivu, Hugo Maria Fernandes simu Grupu Study Tour hosi Australia hamutuk na’in 8 lidera hosi, Kristy Shor Gusmão vizita Centro Chega! tanba hakarak hatene kona-ba istória pasadu luta povu Timor-Leste nian ba ukun rasik-an.

Iha vizita ne’e, Diretór Ezekutivu introduz kona-ba servisu Centro Chega! liu-liu liga ba Relatóriu Chega! no CVA Per Memoriam Ad Spem (PMAS). Depois kontinua ba haree Ezibisaun sira kona-ba Sekuénsia akontesimentu 1974-1999, Ezibisaun Prizaun ba Prizoneiru Politiku, Sala Arkivu no Sela Nakukun.

Hafoin remata vizita, Kirsty Sword Gusmão nu’udar Xefe Grupu Study Tour hosi Australia, agradese Centro Chega! tanba fahe ona informasaun kona-ba istória pasadu povu Timor-Leste nian ba ukun rasik-an no konsidera papél Centro Nacional Chega!I.P importante ba prezervasaun memória pasadu.

Nia haktuir, Centro Chega! tenke halo prezervasaun ba memória pasadu no fahe mós informasaun istória pasadu ne’e ba estudante no joven sira tanba sira balun lahatene kona-ba istória pasadu inan aman nia kontribuisaun ba luta ukun rasik-an.  

“Papél Centro Chega! importante tebtebes tanba ita nia jerasaun foun sira ladun hatene kona-ba buat ne’ebé sira nia inan, aman esperensia iha pasadu. Entaun rai memória sira ne’e importante tebtebes ba sira nia edukasaun jerál”, dehan Kirsty ba Media Chega! iha Antigu Comarca Balide-Dili.

Memória pasadu ne’ebé Centro Chega! prezerva tenke fahe ba eskola sira hahú hosi eskola ensinu Primaria, Pre-Sekundaria, Sekundaria no Universidade nune’e estudante sira bele hatene katak atu hetan ukun-an la’os entrega de’it maibé, liuhosi terus no susar oin-oin.

Ho istória pasadu ne’ebé iha, “tinan-tinan ami sempre inklui Centro Nacional Chega! iha ami nia ajenda, tanba ami hanoin katak sira nia koñesimentu jerál kona-ba buat ne’ebé Timor-Leste liu tiha ona iha pasadu, sira hotu gosta tebes Timor-Leste nia istória pasadu no esperansa ba futuru”.

Sira mós gosta tebes Centro Chega! nia servisu tanba Centro Chega! nia servisu di’ak no importante tebes atu eduka povu kona-ba sofrementu ne’ebé povu Timor liu tiha ona hanesan meius ida atu evita iha futuru labele akontese-tan asaun violasaun direitus umanus.

Vizitante Nandya, hato’o sentimentu kontente no agradese servisu Centro Chega! tanba bele ajuda fahe ona informasaun kona-ba istória pasadu luta povu Timor-Leste nian ba ukun rasik-an no konsidera istória pasadu povu Timor-Leste nia ba ukun rasik-an importante tebes.  

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X