MESSK Sei Integra Bolsu Estudu Ba Sobrevivente Nia Oan iha PAA 2022

81

Dili, Ekipa husi Centro Chega! halo ona enkontru Ekipa husi Ministériu Ensinu Superior, Siénsia no Kultura (MESSK) iha loron Segunda, 09 Agustu 2021, iha Salaun Enkontru MESSK Colmera Dili, hodi ko’alia kona-ba ajustamentu programa ba Planu Asaun Anual 2022 nian liu-liu kona-ba apoiu bolsu estudu ba Sobrevivente nia oan sira.

Iha enkontru ne’e, Diretór Ezekutivu Centro Nacional Chega!I.P Hugo Maria Fernandes akomapña husi Fiskal Úniku (FU) Viriato Quintas, Diretór Divizaun Edukasaun no Formasaun (DEF) Vicente Borges Maia no Diretór Divizaun Relasaun Externa Komunikasaun, Advokasia (DREKA) Gaudencio Soares Souza enkuantu husi MESSK partisipa husi Diretór Nasional Kurikulum Ensinu Superior Luis Aparicio, Diretór Nasionál Tékniku  Ensinu Superior Carlito Menezes no Xefe Departamentu Planu Kurikulum Ensinu Superior Ministériu Ensinu Superior Siensia no Kultura (MESSK) Ancelmo Xavier.

Diretór Ezekutivu Centro Nacional Chega!I.P Hugo Maria Fernandes hato’o agradesementu ba Diretór jerál no nasionál sira iha MESSK tanba bele aseita pedidu Centro Chega! nian hodi halo enkontru ba ajustamentu planu estratéjiku 2022.

Tuir nota entendementu ne’ebé Centro Chega! no MESSK asina ona, nia objetivu mak atu implementa rekomendasaun Chega! no PMAS (Per Memoriam Ad Spem) iha planu asaun annual 2022 nian.

Centro Chega! hakarak halo koordenasaun ho MESSK atu bele integra planu iha 2022, tanba agora dadaun sentru direitus umanus UNTL finaliza ona kurikulum direitus umanus ne’ebé atu hanorin iha estudante sira iha UNTL.

Ho servisu ne’e presiza tebes MESSK ninia apoiu tanba iha tinan oin, sei dezenvolve modul Chega! ba ensinu superior sira. Iha modul nia laran iha matadalan hanorin no formasaun ba dosente sira ne’ebé hetan apoiu liu husi kooperasaun GIZ.

Seluk fali mak promosaun kona-ba sitiu istoriku, alende ne’e mos programa bolsu estudu ba sobrevivente no vitima konflitu pasadu iha 1975-1999 nia oan hodi asesu eskola tanba oras ne’e, Centro Chega! iha ona lista hein submete de’it ba MESSK hodi atibui ba estudante sira tuir rekomendasaun Chega! no CVA ne’ebé responsabiliza husi MESSK .

MESSK hanesan orgaun kompetente ne’ebé iha kompeténsia hodi atribui bolsu estudu ba estudante sira, entaun MESSK bele mos atribui bolsu estudu ba sobrevivente sira nia oan sira bazeia ba lista ne’ebé mak Centro Chega! rejista ona.

Relasiona ho kestaun ne’e, Diretór Nasional Kurikulum Ensinu Superior Ministériu Ensinu Superior Siénsia no Kultura (MESSK) Luis Aparicio agradese ba Centro Chega! ho ekipa tanba bele halo enkontru ho MESSK hodi deskute kona-ba ajustamentu planu 2022 nian.

“Bolsu estudu ba kbiit laek nia oan. Asuntu ida ne’e ami sei hato’o ba Diretór Jerál mak ko’alia, maibé ida ne’e ba ona iha 2022”, dehan Diretór Nasional Kurikulum Ensinu Superior iha enkontru ajustamentu planu 2022.

Atu fó hanoin fali katak iha tinan 2019 Centro Chega!  halo ona rejistu ba vitima no sobrevivente nia oan sira. Tuir lista ne’ebé Centro Chega! iha katak vitima no sobrevivente nia oan sira oras ne’e kontinua hela estudu iha ensinu sekundáriu.




Leave a Reply

Your email address will not be published. Required fields are marked *

error: Alert: Chega! Area Protejidu!
X