MEJD Tenke Uniformiza Materia Edukasaun Sivika no Direitus Umanus

82

Dili – Iha loron Segunda-feira, 9 Maiu 2022, Centro Nacional Chega!I.P lidera hosi Diretór Ezekutivu, Hugo Maria Fernandes hamutuk ho Ekipa halo enkontru ho Komandante Jerál PNTL Komisariu Polísia Faustino da Costa iha kuartel Jerál PNTL, Caicoli-Dili, ne’ebé akompaña hosi Komandante Operasaun Nasional Superintendente Xefe Pedro Belo no Xefe Departamentu Justisa Komando Jerál PNTL Superintendente Xefe Agustinho Gomes.

Objetivu enkontru ne’e, ko’alia kona-ba; – Ida, atualizasaun servisu Centro Chega! liga ho rekomendasaun Chega! ba PNTL (formasaun no protesaun ba direitus umanus). – Rua, diseminasaun Chega! no PMAS ba membru PNTL tanba tinan ne’e, DREKA (Divizaun Relasaun Externa Komunikasaun no Advokasia) sei halo diseminasaun ba membru PNTL hosi Unidade Task Force, Batalhão de Ordem Pública (BOP) no Unidade Polisia Maritima, hamutuk ema na’in 225. – Tolu, partisipasaun PNTL iha programa Prevensaun Konflitu iha nivel Komunidade, liu-liu ba grupu Arte Marsial sira tanba ne’e,  husu PNTL atu envolve mós iha programa ne’e.

Iha enkontru, Diretór Ezekutivu Centro Chega! Hugo Maria Fernandes dezafia PNTL atu implementa Rekomendasaun Chega! no PMAS ne’ebé atribui ba instituisaun seguransa, liu-liu iha área reforma institusional, formasaun Direitus Umanus ba membru PNTL sira, diseminasaun Chega! no PMAS ba Membru PNTL sira, nune’e sira bele sensivel ba istória pasadu Timor-Leste nian no ikus mak envolve iha asaun prenvesaun konflitu sira.

Komandante Jerál Polisia Nasional Timor-Leste (PNTL), Komisariu Polísia Faustino da Costa esplika, PNTL disponibilidade servisu hamutuk ho Centro Chega! ba implementasaun Rekomendasaun Chega!, liu-liu iha área Formasaun Direitus Umanus ba Membru PNTL sira, diseminasaun Chega! no PMAS, ajusta materia Chega! iha kurikulu Akademia Polisia. PNTL prontu nafatin atu envolve iha atividade sira liga ba pevensaun konflitu ne’ebé sei halo hosi Polísia Komunitária.

Maibé, Ministeriu Edukasaun Juventude no Desportu (MEJD) presiza atu uniformiza materia edukasaun sivika no direitus umanus hodi hanorin estudante sira hahú hosi eskola ensinu baziku to’o iha ensinu superior para sira bele hatene.

Razaun uniformiza materia edukasaun sivika no direitus umanus iha eskola, ho objetivu atu hametin espiritu nasionalizmu no patriotizmu estudante sira nian bainhira sira  hili knar nu’udar membru PNTL ida, sira bele servi povu no nasaun ida ne’e ho fuan no laran.

Alende ne’e, Governu Timor-Leste presiza mós tau matan ba Membru PNTL sira nia Bein Estar, Ekipamentu, Aumenta númeru PNTL no determina estatutu PNTL, nune’e bele halo knar sira ho professional no kontribui ba implementasaun Rekomendasaun Chega! no PMAS.

Hafoin termina enkontru, Diretór Ezekutivu Centro Chega! entrega Relatóriu Chega! no Livriñu Rekomendasaun Chega! ba Komandante Jeral PNTL, enkuantu Komandate Jeral PNTL entrega plaka PNTL ba Centro Chega! nu’udar simbolu hametin kooperasaun.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X