Masakre Rezidénsia Manuel Carrascalão

62

Masakre iha Rezidénsia Manuel Carrascalão akontese iha loron 17 Abríl 1999, semana rua liu tiha hafoin akontesimentu Masakre iha Igreja São João de Brito Liquiça iha loron 6 Abríl 1999. Vítima sira husi masakre ne’e mak ema pro-independénsia no vítima sira ne’ebé halai ka evakua husi Maubara no Liquiça hafoin akontesimentu Masakre.

Insidente ne’e akontese hafoin sorumutu boot ida ne’ebé paritisipa husi ema kuaze 5.000 husi Forsa Kombatente Integrasaun (Pasukan Pejuang Integrasi) iha Palasiu Governadór nia oin (Atuál Palasiu Governu). Durante sorumutu boot ne’e, lider pro-integrasaun sira provoka ema atu kaer no oho sira ne’ebé la apoia integrasaun ba Indonézia. Sorumutu ne’e partisipa mós husi autóridade altu governu nian, inklui Governadór Provinsia – Abilio Soares, Administradór (Bupati) Dili – Domingos Soares, Komandante Korem Timor Timur – Koronel Tono Suratman, Adjuntu Operasaun Xefe Estadu Maiór Ezersitu – Maijór Jenerál Kiki Syahnarki no Ofisiál Altu sira seluk tan.

Dala ida tan, atake ne’e hatudu sinál katak Militár Indonézia no Milisia Pro-Integrasaun ho serteza servisu hamutuk duni. Hafoin sorumutu iha Palasiu Governadór nia oin, Grupu Milisia komesa halo karavana haleu Dili, sira halo atake ba alvu balun durante sira nia karavana ne’e, molok to’o iha Rezidénsia Manuel Carracalão.

Maizumenus ema na’in 150 mak buka hela protesaun iha fatin ne’e, hafoin sira halai no evakua husi atake oi-oin ne’ebé akontese antes ona hanesan akontesimentu iha Masakre Igreja Liquiça. Durante atake ne’e, Milisia Aitarak no Besi Merah Putih oho Manuel Carrascalão nia oan mane ne’ebé sei joven hela, ho naran Manuelito. Vítima balun ne’ebé mate tanba asaun husi Milisia ho sasan kroat mak hanesan Eduardo de Jesus, Alberto dos Santos, Antonio da Silva Soares, Januario Pereira, Raul dos Santos Cancela, João dos Santos, Crisanto dos Santos, Rafael da Silva, Afonso Ribeiro, César dos Santos no seluk tan, enkuantu Augustinho Benito X. Lay hetan kanek todan maibé konsege salva.

Vítima balun tenta atu haksoit sai husi moru iha rezidénsia ne’e, maibé lakonsege salva tanba Uma ne’e serku ona husi Milisia armadu sira. Testamuña barak konfirma ona katak, Membru Forsa Indonézia ho roupa sivíl husi Koramil Maubara envolve mós iha atake ne’e. Maibé Komandante Korem Timor Timur – Koronel Tono Suratman rejeita atu halo intervensaun bainhira Manuel Carrascalão husu nia atu hapara atake ne’e.

Referénsia husi Relatóriu Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X