Loron 4 Setembru Konsideradu Nu’udar Loron Vitória Ba Ukun-An

70

Dili – Diretór Ezekutivu Centro Nacional Chega!I.P Hugo Maria Fernandes konsidera, loron 4 Setembro nu’udar loron vitória ba ukun rasik-an, tanba ne’e husu estadu no governu tenke konsidera loron ne’e sai loron nasionál.

“Husi Centro Chega! nia pontu devista loron sira hanesan ne’e importante atu ita komemora. Agora kabe ba iha governu, parlamentu nasionál atu halo rezolusaun ida atu dekreta katak loron ida ne’e tama iha loron nasional Timor-Leste nian”, dehan Hugo ba jornalista sira iha servisu fatin, Sexta-Feira (03/09/2021).

Nia hatutan, agora depende ba Parlamentu Nasional (PN) ou Konsellu Ministru (KM) tanba sira mak halo desizaun no bele  hateten katak 4 Setembro nu’udar loron nasionál ida ba ema hotu-hotu tanba iha  loron 4 Setembro anúnsia rezultadu votasaun husi Sekretariu Jerál ONU. Husi rezultadu ita manan maibé kontinua akontese masakre barak hanesan, masakre Igreza Suai, masakre Apikuru-Lospalos, oho madre sira no mos masakre sira seluk.

Nia afirma, hafoin rezultadu hatudu ita manan, ita hanoin buat hotu di’ak, maibé realidade oin seluk, tanba hafoin ONU anúnsia rezultadu ita manan, povu hasoru sofrementu barak, povu balun mate no balun hetan violasaun direitus umanus oin-oin.

Tanba ne’e mak kontinua importante atu selebra loron 4 Setembru nu’udar loron vitoria nasional nian no mos loron reflesaun katak ita manan ita kontinua hasoru hela terus barak no terus ne’e to’o bainhira INTERFET tun ona iha timor.

Tanba ne’e mak Centro Chega! kontinua konsidera katak loron 4 Setembro nu’udar loron nasionál ida ne’ebé mak fo vitória boot ba Timor, no ita tenke kontinua valoriza loron 4 Setembro ne’e tanba husi loron ne’e mak bele hateten ba mundu katak povu ukun rasik-an.

Entretantu, iha loron 4 Setembru 1999, Sekretáriu Jerál Organizasoens Nasoes Unidas (ONU), Kofi Annan anúnsia rezultadu votasaun ne’ebé rejeita Autonomia Espesiál ho votus 344.580 (78,50%) no aseita opsaun Autonomia Espesiál ho votus 94.388 (21,50%).




Leave a Reply

Your email address will not be published. Required fields are marked *

error: Alert: Chega! Area Protejidu!
X