Komunidade Islámico Apoia Centro Chega! Implementa Rekomendasaun Chega! no PMAS

37

Dili, Centro Nacional Chega!I.P liu husi Divizaun Relasaun Esterna Komunikasaun no Advokasia (DREKA) iha loron 12 Agusto 2021realiza atividade diseminasaun informasaun ba komunidade Islamika sira iha Kampo Alor, Dili, ho tema “Papel Centro Nacional Chega! Ba Implementasaun Rekomendasaun Sira Husi Relatóriu Chega! no CVA”.

Tuir Vise Prezidente Konsellu Nasionál Izlámiku Timor-Leste (KONISTIL) Abdullah Inacio A. Soares lori komunidade izlámiku Timor-Leste nia naran hato’o agradesementu ba Centro Chega! tanba bele fahe ona informasaun kona-ba relatoriu Chega! no CVA (Comição Verdade e Amizade) ba sira.

“Ami agradese tebes ba Centro Chega! tanba halo diseminasaun informasaun iha fatin ne’e. Ida ne’e foin preimeira ves”, dehan Abdullan hafoin remata partisipa desiminasaun informasaun ba komunidade musulumanu iha Kampo Alór, Dili, Kinta (12/08/2021).

Nia dehan, tanba ne’e, liu husi diseminasaun informasaun bele aumenta koñesimentu komunidade musulumanu nian liu-liu joven no estudante sira tanba  informasaun ne’e liga ba istória Timor-Leste nian.

Tanba ne’e, nia enkoraja jerasaun foun sira atu aprende istoria ho didi’ak, basa istoria ne’e sai hanesan matadalan ba jerasaun foun sira no liu husi istória bele hametin no haburas Espiritu patriotizmu no nasionalizmu rai ne’e.

Alende ne’e, Diretor Ezekutivu Centro Nacional Chega! Hugo Maria Fernandes mos agradese ba komunidade musulmanu tanba bele halo kooperasaun servisu di’ak ho Centro Chega! hodi partisipa programa diseminasaun informasaun kona-ba servisu Centro Nacional Chega! no implementasaun rekomendasaun relatóriu Chega! no CVA.

Nia mos enkoraja komunidade Musulumanu Indonézia sira iha Timor-Leste katak, sira lala’o  mesak, maibé estadu no governu kontinua fó atensaun ba sira. Maske uluk Indonésia no Timor-Leste funu hasoru malu tanba kontra rejime no agora komunidade Timor-Leste no Indonézia hamutuk hodi hateke ba futuru ida di’ak tuir rekomendasaun Chega! 1974 -1999 no relatoriu CVA 1999 nian.

Tuir planu tinan ne’e, Centro Chega! kontinua foku desiseminasaun informasaun ba grupu konvikasaun relijioza  sira seluk hanesan komunidade protestante no katolika sira ne’ebé eziste iha Timor-Leste.

Entertantu, estudante Koyrrola Lisa Ramos Costa sente kontente hodi partisipa iha programa diseminasaun informasaun ne’ebé oferese husi Centro Chega!, tanba ho informasaun ne’e bele aumenta koñesimentu no nia kompromete katak sei fahe tutan informasaun ne’ebé hetan ba kolega musulumanu sira sira seluk liu husi Klibur Musulumana Timor-Leste (KMTL).




Leave a Reply

Your email address will not be published. Required fields are marked *

error: Alert: Chega! Area Protejidu!
X