Komemorasaun Masakre Fatisi iha Aileu Nu’udar Aktu Rekonsiliasaun

51

Aileu – Diretór Ezekutivu Centro Nacional Chega!I.P Hugo Maria Fernandes hateten, Centro Chega! hamutuk ho Asosiasaun Vítima Konflitu 1974-1999, Komisaun Organizadóra Masakre Fatisi inklui autoridade lokál no komunidade Suku Fatisi, Postu Administrativu Laulara, Munisípiu Aileu komemora masakre Fatisi ba dala 46 nu’udar aktu rekonsiliasaun ida.

Tuir nia, tanba liu husi komemorasaun ne’e, família vítima no sasin husi masakre Fatisi bele hadame malu liu husi rekonsiliasaun nahe biti boot, haree malu ho di’ak, hakuak malu no kaer liman ba malu, hafoin akontese tiha Masakre Fatisi ne’ebé halo sira hirus no odi malu.

Hugo konsidera katak eventu komemorasaun sira ne’e, importante tebes ba jerasaun foun sira bele aprende. Tanba ita lori estudante sira ba vizita fatin akontesimentu masakre Erhitu ho konta istoria no kari’i aifunan.

“Importante ba Centro Chega! atu kontinua apoiu koopera hamutuk ho asosiasaun vítima husi nasionál to’o iha munisípiu, depois husik hela eventu ida ne’e nu’udar eventu aprende ba jerasaun foun sira iha Suku Fatisi no mos ba Timoroan tomak”, dehan Diretór hafoin remata komemorasaun Masakre Fatisi, iha sede Suku Fatisi, Aileu, Sesta-feira (20/08/2021).

Enkuantu, Vítima Masakre Fatisi, Antonio Tilman sente kontente hodi partisipa iha eventu komemorasaun masakre Fatisi tanba bele rona no vizita fila fali fatin masakre Erhitu no hanoin fali akontesimentu pasadu.

“Maske ha’u triste maibé ita labele hela ho ida ne’e, tanba buat sira ne’e liu ona, ita tenke haree fali buat foun, ita tenke haluha ona, liu ona, sai hanesan istória ba Timor no ita tenke husik”, nia enkoraja.

Hanesan vítima Masakre Fatisi hakarak rekomenda ba governu hodi taumatan ba vítima sira tanba konsekuénsia husi funu maun alin família balun tenke husik nia feen no oan. Uluk to’o ohin loron, sira hela hanesan vítima no nunka hetan apoiu ruma husi estadu no mos seidauk hetan rekoñesimimentu. 

Iha sorin seluk, Família vítima, Francisco Ataide sente kontente hodi partisipa iha eventu komemorasaun masakre Fatisi tanba liu husi komemorasaun ne’e bele halo rekonsiliasaun no dame malu. Uluk haree malu ladi’ak, odi malu no sempre kria problema ba malu, maibé liu husi rekonsiliasaun haree malu ho di’ak.

Hanesan joven sente kontente hodi partisipa eventu komemorasaun loron masakre Fatisi ne’ebé monu iha loron 20 Agustu 1975-2021 ba dala 46, no komemorasaun ne’e foin hahú dahuluk tanba ne’e, nia husu, ba futuru kontinua nafatin halo komemorasaun masakre Fatisi atu sai lisaun di’ak ba joven sira aprende.




Leave a Reply

Your email address will not be published. Required fields are marked *

error: Alert: Chega! Area Protejidu!
X