Komandante PNTL Covalima Konsidera Papél Centro Chega! Importante

75

Covalima – Komandante Polisia Nacional Timor-Leste (PNTL) Munisipiu Covalima, Basilio de Jesus konsidera papél Centro Nacional Chega!I.P importante tanba halo komemorasaun ba masakre sira ne’ebé akontese pasadu hosi 1974-1999.

Nia haktuir, komemorasaun masakre Nikir-Hatu-metan loron 23 Abril 1999 – 23 Abril 2022, Suku Beiseuk, Postu Administrativu Tilomar, Munisipiu Covalima atu fó hanoin ba ita kona-ba akontesimentu pasadu hodi relembra fila fali martires sira nia mate tanba defende ukun rasik-an.

“Ita halo selebrasaun ida fó hanoin ba ita atu relembra fila fali akontesimentu masakre iha fatin ida ne’e. Masakre ne’ebé akontese tinan 21 liu ba. Ita hateke ba kotuk relebra fila fali ita nia martires ne’ebé fó nia-an tomak ba independénsia”, dehan Komandante PNTL Munisipiu Covalima iha diskursu serimónia komemorasaun masakre Nikir-Hatu-metan,Tilomar, Sexta-feira (23/04/2022).

Independénsia ne’ebé ohin loron ita hetan no ema hotu joga tanba ema sosa ruin no ran no mate balun lakon sira nia familia. Ita sira ne’ebé sei moris fó ondra ba sira, fó valor ba sira fó agradesementu ba sira.

Ita agradese sira, ba sira nia memória ne’ebé husik hela mai ita hodi aprende no tau iha fuan, tau iha ulun (kakutak) no hakat ba oin kontribui ba iha ita nia independénsia ida ne’e liuhosi prosesu dezenvolvimentu nasionál.

“Sira (Centro Chega!) reprezenta estadu ida ne’e, ita nia governu ida ne’e, hodi hatutan mataween, hatutan halerik feto faluk oan kiak sira ne’ebé husik hela iha rai ida ne’e”, nia agradese ba prezensa Centro Chega!.

Ho sira nia prezensa fo hanoin ba ita hotu no ba familia sira. Iha fatin ida ne’e, hanesan pasu primeiru ba ita halo, ita hahú, maibé la’os final, la’os remata, maibé husu ba estadu no governu kontinua identifika mate sira ne’ebé iha.

Sira na’in lima (5) ne’ebé mate hanesan; – Aleixo Ximenes, Tomas Cardoso, Paulos Ximenes, Ludufiku Rabu, Bendito do Nacimento. Sira ne’e la’os ema boot ida, maibé ema simples de’it, sira fo-an ba mate tanba de’it hakarak hetan ukun rasik-an.  

Sira nia mate, husik hela memória lubuk ida ba ita atu relembra nafatin.  Hanoin hikas nafatin ba buat hotu ne’ebé mak akontese iha tinan hirak liu ba. Ita hahú ohin, maibé la’os para ona. “Sira mate la’os tanba mate moras, maibé sira mate tanba hetan torturasaun. Ita ne’ebé iha, hau fiar katak ita hetan kbi’it forsa no saúde ne’ebé di’ak”, nia fó hanoin.

Tanba ne’e,  hanesan Komandante PNTL husu ba inan, aman no joven sira tenke valoriza martires sira tanba ho sira nia luta mak ohin loron Timor-Leste sai nasaun ida livre no independénte no ohin loron ema hotu goja.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X