KAI Apresia Centro Chega! Programa Halo Uma ba Sobrevivente

85

Dili – Membru Konsellu Asesoria Internasional (KAI) hosi nasaun Indonézia, Galuh Wandita Soedjatmoko  hato’o apresiasaun ba servisu Centro Nacional Chega!I.P ba programa halo uma “Da Memória À Esperança” ba sobrevivente sira ne’ebé moris vulneravel liu.

Tuir Wandita, programa halo uma “Da Memória À Esperança” ba sobrevivente ne’e importante tebes no husu kontinua nafatin programa ne’e, maske servisu todan maibé ho ekipa servisu Centro Chega! apoiu hosi parseiru sira sei bele realiza.

Wandita mós husu Centro Chega! presiza hadia kritéria balun, ezemplu halo uma sobrevivente sira tenke iha rai, tenke iha oan. Tuir lolos kriteria hanesan ne’e tenke hasai tanba ita nia objetivu lolos mak tulun sobrevivente.

“Programa di’ak halo uma ba sobrevivente sira”, dehan Wandita bainhira partisipa enkontru parseria ne’ebé realiza iha salaun koferensia Centro Chega! antigu Comarca Balide-Dili, Kuarta-feira, (29/04/2022).

Nia konsidera, planu di’ak no mehi di’ak. Maske servisu todan, maibé apoiu hosi sobrevivente no Sosiedade Sivil sira programa bele la’o tanba programa ne’ebé Centro Chega! halo ne’e la’os mehi ka promesa de’it, maibé implementa.

Wandita rekomenda ba Centro Chega! atu implementa atividade no programa ruma presiza involve sobrevivente sira, nune’e  programa no atividade hotu-hotu Centro Chega! nian. Sobrevivente sira labele sai de’it  benefisiariu ba programa no atividade, maibé tenke sai autór ba implementasaun programa.

“Hau hanoin best practise iha mundu involvimentu sobrevivente ne’e importante liu bainhira ita halo programa post konflik iha aspeitu tradisional justice. Involvimentu ka partisipasaun sobrevivente ne’e hanesan fundasaun ba transformasaun ba oin”, Wandita rekomenda.

Ba oin Centro Chega! labele haluha sobrevivente sira ne’ebé mak vulneravel liu. No nia mós husu ba Centro Chega! presiza dudu fali lia loos iha Indonesia. Tanba Centro Chega! nia promesa mak labele repete violensia.

Diretór Divizaun Relasaun Externa, Komunikasaun no Advokasia (DREKA), Gaudencio Soares Souza esplika, tinan ida ne’e Centro Chega! sei halo programa interkambiu kulturál entre Timor-Leste ho Indonézia.

Prosesu koordenasaun servisu oras ne’e la’o ona ita presiza halo uluk enkontru ho pusat kebudayaan Indonézia ita sei halo diskusaun hodi deside saida mak ita presiza halo iha tinan ida ne’e.

Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X