Inês Maria de Almeida

Inês Maria de Almeida – Presidente Konsellu Administrasaun

88

Inês Maria de Almeida, konhesida ho Inês Almeida moris iha Dili, iha loron 21 de Janeiro de 1963. Wainhira akontese funu-sivil 1975 iha Timor-Leste, nia ho ninia familia halai ba Australia  nudar refuziadus. Desde tinan 1979 sai nudar ativista hodi luta ba independensia Timor-Leste, no ativamente hola parte mos iha eventus kulturais, iha Centro Cultural de Timor-Leste (CCTL).

Iha tinan 1989, sai nudar Vice-Coordenadora Komite Fretilin iha Sydney (KFS), Australia. Tinan 1992, Inês Almeida, hamutuk ho Timor-Oan sira seluk estabelese Timor Timor Relief Association (ETRA), organizasaun sosiedade sivil ho sede iha Sydney, Australia, neébe habelar informasoens konaba luta libertasaun patria atraves radio, material impresu, nomos dezenvolve rede kooperasaun ho grupus solidariedade sira seluk, hodi buka apoiu lojistiku no finanseira ba forsas armadas.

Iha parte seluk, Inês Almeida mos partisipa iha dialogus entre Timor-Oan mak halao iha Australia 1995, 1996, 1997 no 1998), partisipa sorumutu Convenção Nacional Timorense iha Peniche, Portugal iha tinan 1998, hanesan membru Conselho Nacional da Resistencia de Maubere (CNRM).

Inês Almeida ho ativu hola parte iha konferensias internasionais konaba konflitu iha Timor-Leste, inkluindu konferensia neébe halao iha Nairobi (1985), Vanuatu (1987), Nova Zelândia (1990), Manila (1994), Japão (1994), Coréa do Sul (1995), Pequim (1995) no Canadá (1997).

Hafoin Timor-Leste ukun rasik-an, Inês Almeida servisus nudar konsultor iha ministeriu rua. Iha tinan 2016, hafoin estabelese Centro Nacional Chega!I.P, Inês Almeida simu tomada da pose hosi Primeiru Ministru Rui Maria de Araújo nudar Presidente Konsellu Administrasaun ba periodu 2017 – 2020.

Iha meadus 2019, Governu Timor-Leste hatoó proposta ba Presidente da República hodi nomeia Inês Almeida nudar embaixadora Timor-Leste ba Australia, maibe nomeasaun ofisial foin akontese iha dia 28 de Janeiro de 2020. Iha dia 19 de Fevereiro de 2020, iha Canberra, Australia, Inês Almeida entrega ninia kredensiamentu (karta kredensial) ba David Hurley.* [Fontes: www.wikipedia.org].




Leave a Reply

Your email address will not be published. Required fields are marked *

error: Alert: Chega! Area Protejidu!
X