IDN Prontu Koopera ho Centro Chega! Atu Integra Istória no Direitus Umanus iha Kurikular Formasaun

55

Dili- Diretór Akadémia Instituto Defeza Nasional (DAIDN), Guilherme Soares deklara, IDN prontu atu asina Nota Entendementu (Memorandum Of Understanding) ho Centro Chega! no enkaixa (integra) materia istória Timor-Leste no Direirus Umanus (DU) ba iha unidade kurikulár formasaun nian.

Tanba IDN hanesan instituisaun estadu nian, ne’ebé durante ne’e fó formasaun ba Polisia Nasional Timor-Leste (PNTL) no Falintil Forsa Defeza Timor-Leste (F-FDTL), ne’ebé hala’o kna’ar iha área defeza no seguransa iha rai laran.

Agora dadaun IDN halo hela formasaun kona-ba kursu Estadu Maior Konjuntu Integradu. Formasaun ida ne’e ita fahe ba komponente tolu; – Ida komponente baze iha unidade kurikular 5. – Rua komponente espesífiku. Komponente espesifik ne’e fahe materia PNTL aprende kona-ba siénsia polisiais no siénsia kriminál. Ba F-FDTL aprende kona-ba siénsia militar. – Terseiru komponente formasaun konjunta ne’e ita junta hamutuk entre PNTL no F-FDTL.

“Kada formasaun ita bele enkaixa iha unidade kurikular kona-ba ita nia istória, direitus umanus no rekonsiliasaun.”, dehan Diretór bainhira halo enkontru ho Diretór Divizaun sira husi Centro Chega! iha salaun enkontru IDN, Palasiu Governu-Dili, Sexta-feira (25/02/2022).

Guilherme informa, istória Timor-Leste  ema hotu presiza aprende para labele repete fila fali buat sira ne’ebé akontese tiha ona tanba istória sai hanesan baze ida ba ita aprende hakat ba oin. Maske  istória ida ne’e moruk tebes maibé ema labele haluha.

Iha fulan Marsu IDN foin hahú formasaun, entaun agora ita bele enkaixa materia sira ne’e iha laran.  No ita boot sira mos bele fó formasaun, tanba sira ne’ebé partisipa formasaun, ema sira ne’ebé mak iha nivel estratéjiku nian katak sira ne’ebé mak aban bainrua atu ba kaer duni komponente hanesan halo planeamentu no organiza forsa sira.

Nia mos rekomenda ba Centro Chega!, ba futuru IDN no Centro Chega! bele peskiza hamutuk tanba IDN iha Diresaun ida halo peskiza kona-ba memória estratejika iha Diresaun Investigasaun.

Diretór Divizaun Relasaun Externa, Komunikasaun Advokasia (DREKA), Gaudencio Soares Souza, informa, planu Centro Chega! nian, iha tinan ida ne’e foku ba dezenvolve kurikulum ba formasaun direitus umanus no ita nia memoria pasadu. Nia konteúdu tomak ita uza ita nia esperensia pasadu.

Centro Chega! hanoin katak importante uza memória pasadu, direitus umanus no rekonsiliasaun ne’e sai hanesan lisaun ida ba formasaun ne’ebé mak IDN halo.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X