Grupu FHC Hamutuk Ema Na’in 27 Vizita Centro Chega!

86

Dili- Grupu Forsa Humanista Covalima (FHC) hamutuk ema na’in 27 halo vizita mai iha Centro Nacional Chega!I.P tanba hakarak hatene istória povu Timor-Leste nia kona-ba luta ukun rasik-an.

Iha vizita ne’e, fasilita husi Ofisiál Edukasaun no Formasaun, Flamina Belo, ne’ebé halo uluk introdusaun kona-ba Centro Chega!, depois hodi sira ba vizita fatin ezibisaun istóriku, sala biblioteka no sela nakukun, no remata aprezentasaun filme ho titulu “Rezistir e Vençer” no “Dalan Ba Dame”.

Durante akompaña filme rua, joven sira ne’e, balun hamonu matabeen tanba haree ba aktu violensia ne’ebé militar Indonézia sira halo ba Timoroan sira durante funu iha tinan 1975-1999.

Prezidente Sesante FHC, Gabriel Francisco de Araujo Ukat hato’o sentimentu kontente tanba bele vizita Centro Chega! atu hatene no kompriende istória povu Timor-Leste nia kona-ba luta ukun rasik-an hodi hametin espiritu nasionalizmu no patriotizmu foinsa’e sira.

“Ida ne’e hanesan oportunidade no previlejiu di’ak ba ekipa haree istória hodi hafanu espiritu nasionalizmu no patriotizmu ba foinsa’e sira”, dehan Gabriel ba media Chega! iha salaun konferensia Centro Chega!, antigu Comarca, Balide-Dili, Sexta-feira (11/02/2022).

Depois remata vizita, Gabriel konta katak, nia sente triste tebes haree istória terus no susar ne’ebé Timoroan sira hasoru durante tinan 24 nia laran, maske hasoru sofrementu oin-oin maibé ohin loron povu Timor-Leste hetan ona nia independénsia.

Nia subliña, “ba prosesu hirak ne’ebé mak ita nia éroi no éroina sira hasoru iha tempu uluk ne’e sai hanesan prosesu ida ne’ebé mak moruk tebes, maibé ikus hanesan aifuan ne’ebé midar ba jerasaun foun sira”.

Gabriel informa, iha tempu agora foinsa’e sira estuda makaas atu sai matenek hodi kontribui ba dezenvolvimentu nasionál.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X