Diretór Centro Chega! Atualiza Progresu Servisu ba PM

51

Dili – Loron 25 Maiu 2021, Diretór Ezekutivu Centro Nacional Chega!I.P Sr. Hugo Maria Fernandes hala’o enkontru ho Sua Exelénsia Primeiru-Ministru Taur Matan Ruak, iha Rezidénsia Xefe Governu Palapasu-Dili hodi atualiza servisu Centro Chega! nian.

Hafoin enkontru, Sr. Hugo Maria Fernandes hateten, Centro Chega! kontinua aliña ho polítika VIII Governu Konstitusionál nian hodi haree liu ba kontinua preserva memória pasadu liu husi peskiza istóriku, digitalizasaun arkivu, mapamentu ba fatin istóriku sira.

“Ohin, ha’u informa ba Primeiru-Ministru kona-ba servisu ne’ebé Centro Nacional Chega! halo iha primeiru trimestre, husi fulan Janeiru to’o Marsu, no mós progresu servisu fulan Maiu nian”, dehan Diretór Centro Chega!

Durante ne’e, Centro Chega! mós integra konteúdu balun husi Relatóriu Chega! ho PMAS iha kurikulum de ensinu. Tanba ne’e, tinan kotuk ita halo ona submisaun ba Ministériu Edukasaun kona-ba kurikulum ba materia Ciênsia Sosiais no Istoria Jeografia. Material ne’e ba estudante sira Terseiru Siklu no Sekundária. Tinan ne’e, konsultór timoroan na’in 2 halo hela halo avaliasaun kurikulum ba materia hanesan ba Segundu Siklu.

Diretór Ezekutivu ne’e mós informa tan ba PM kona-ba parseria ne’ebé Centro Chega! halo hamutuk ho Centro Integrado Gestão Crise (CIGC) no Mnisteriu Saúde (MS) hodi halo ajustamentu ida kona-ba Ospitál Lahane tanba Ospitál ne’e hanesan sitiu istoriku ida no agora uza ba sala izolamentu.

Servisu seluk ne’ebé halo mak iha semana kotuk, Centro Nacional Chega!I.P halo parseria ho PALOPS (Paises Africanos de Lingua Oficial Portugues) inklui Portugal ho Timor-Leste ne’ebé ho objetivu atu halo peskiza. Títulu ba peskiza mak ‘Rezistensia Nu’udar Afirmasaun Kulturál’. Peskiza ne’e sei hala’o iha Timor-Leste no hetan apoiu husi Uniaun Eropeia no Institutu Camoes ba tinan 3.

Alende ne’e, Centro Chega! mós halo ona akordu ho KOICA (Korea International Cooperation Agency) ba apoiu finanseiru ho montante osan kuaze millaun 5 ba tinan 4 nian ba iha programa tolu hanesan; Primeiru programa digitalizasaun arkivu no rehabilitasaun sentru arkivu. Segundu estabelese sentru edukasaun ba dame. Terseiru programa interkambiu kona-ba konflitu no rekonsiliasaun iha rejional.

Diretór mós hato’o preokupasaun ba PM kona-ba situasaun Covid-19 ne’ebé akontese iha rai laran hodi implika ba servisu Centro Chega! nian ne’ebé tuir planu barak mak atu halo iha munisipiu sira, maibé labele realiza. 

Entertantu, haree ba progresu servisu ne’ebé halo ona, Exelénsia Primeiru Ministru Taur Matan Ruak apresia tebes ba esforsu ne’ebé ekipa Centro Chega! halo liu-liu tinan ida ne’e. Nia mós fó orientasaun atu halo ajustamentu programa no revizaun ba orsamentu. Nia enkoraja Centro Chega! atu kontinua servisu hamutuk ho parseria no ajensia internasionál sira ne’ebé mak tulun tebes iha aspeitu osan.




Leave a Reply

Your email address will not be published. Required fields are marked *

error: Alert: Chega! Area Protejidu!
X