CNC Tenke Kontinua Haklean Istória Rezisténsia

47

Dili, 7 Dezembru 2022 – Centro Nacional Chega!I.P tenke kontinua haklean istória rezisténsia nian kona-ba saida mak akontese iha tempu rezisténsia liga ba frente tolu hanesan; Frente Armada, Frente Klandestina, no Frente Diplomatiku.

Reprezentante Primeiru Ministru (PM), Taur Matan Ruak liuhusi Ministru Justisa (MJ), Tiago Amaral Sarmento hato’o asuntu ne’e bainhira ensera serimónia festiva kultura rezisténsia populár no komemora loron memória nasionál, 7 Dezembru 1975.

Atividade festiva kultura rezisténsia populár no komemora loron memória nasionál ne’e organiza husi Centro Chega! hamutuk ho Teatru Timor-Leste (TERTIL). Atividade festiva kultura ne’e, hala’o durante loron 5, ho objetivu atu prezerva, konserva no promove istória pasadu ba iha públiku atu ema hotu bele hatene.

Iha biban ne’e, Ministru haktuir, loron 7 Dezembru nu’udar loron istóriku tanba loron ida ne’e mak ita nia éroi no martires sira sakrifika sira nia-an ba terus, susar no mate durante tinan 24 nia laran.

Tanba ne’e, liuhusi festival kultura rezisténsia populár atu promove dokumentus istóriku sira liu-liu dokumentus informativu ne’ebé iha, ita tenke digitaliza no rai didi’ak, konserva didi’ak atu nune’e iha futuru, ita nia oan, beoan sira bainhira sira bele le’e hodi hatene.

Ida ne’e, Centro Chega! nia papél atu implementa rekomendasaun sira husi relatóriu CAVR oinsá mak taumatan, prezerva no konserva dokumentus istória pasadu nian. Nomós fahe informasaun ba públiku liuhusi ezibisaun sira hanesan ezibisaun kona-ba ema hamlaha, lansamentu Jardin Memoria Viva iha Antigo Comarca Balide, Dili.

“Ita tenke kontinua nafatin atividade sira hanesan ne’e, kontinua nafatin ke’e sai buat hotu ne’ebé liga rezisténsia ninia, Frente Armada, Frente Klandestina, Frente Diplomatika, saida de’it mak akontese, saida de’it mak sira uza,” Reprezentante PM informa.

CNC mós tenke fó sai aimoruk tradisional sira ne’ebé uza iha tempu rezisténsia ba públiku atu ema hotu bele hatene. Uluk lauza mediku modernu, maibé konsege uza hodi salva sira nia vida bainhira iha tempu difisil nia laran.

Ida ne’e mak CNC tenke esforsu hodi rekolla, prezerva no konserva para sai hanesan istória ne’ebé husi jerasaun ba jerasaun tomak aprende no labele haluha. Alende ne’e, iha mós muzika rezisténsia, kultura rezisténsia, lingua rezisténsia no simbolu rezisténsia.

“Iha buat oin-oin ne’ebé presiza konserva, nomós prezerva atu nune’e memória hirak ne’e bele tau iha fatin ida, no bele tane nafatin, dignifika atu nune’e iha jerasaun oin mai labele haluha buat hotu ne’ebé akontese iha pasadu durante luta ba ukun rasik-an nian,” tenik Ministru.

Tanba ne’e husi parte governu ne’ebé hetan delegasaun husi Sua, Exelensia Primeiru Ministru (PM), Taur Matan Ruak, hakarak hato’o parabens ba CNC ba realizasaun festival kultura rezisténsia populár.

“Molok hau remata hau nia liafuan, hau nia sujestaun ikus liu, husu ba CNC atu kontinua haklaken, nomós kontinua halo dokumentasaun ne’ebé klean liu-tan husi relatóriu CAVR ninia tanba iha buat balun ne’ebé pesiza foka sai, fo sai, dokumenta sai iha muzeum ou tau iha livru ruma para depois ema hotu-hotu lee,” nia sujere.

Media Chega!

 




Leave a Reply

Your email address will not be published. Required fields are marked *

error: Alert: Chega! Area Protejidu!
X