CNC- PUSDEMA Indonézia Halo Enkontru Koordenasaun ba Programa Peskiza Konjunta Entre TL-RI

23

Yogyakarta, 23 Dezembru 2022 – Delegasaun Centro Nacional Chega!I.P lidera husi Xefe Departamentu Peskiza, Nolasco Mendes no Ofisial Peskiza, Yazalde Manaka Savio halo enkontru koordenasaun ho Pusat Kajian Demokrasi dan Hak-Hak Asasi Manusia (PUSDEMA), iha Sanata Dharma Yogyakarta-Indonézia.

Objetivu husi enkontru ne’e, parte rua, Centro Chega! ho PUSDEMA atu kria koordenasaun servisu ba implementasaun programa peskiza hamutuk (konjunta) entre Timor-Leste no Indonézia ne’ebé haktuir ba mandatu Centro Chega! nian katak, konsolida parseria nasionál no internasionál ba implementa rekomendasaun relevante sira hosi Relatóriu Chega! no PMAS.

Nune’e, iha tinan ida-ne’e, Centro Chega! hahú inisiativa hodi kria koordenasaun servisu ba realiza peskiza konjunta entre akadémiku no péritu sira iha Indonézia, ne’ebé sai hanesan rekomendasaun prinsipál ida hosi relatóriu rua refere, ho objetivu atu hamosu komprensaun mutua kona-ba istória pasadu ne’ebé envolve nasaun rua ne’e.

Iha loron dahuluk, 20 Dezembru 2022, Delegasaun Centro Nacional Chega!I.P lidera husi Xefe Departamentu Peskiza no Ofisial Peskiza, hamutuk ho PUSDEMA halo audiénsia ho Reitor Universidade Sanata Dharma, Romo Albertus Bagus Laksana, SJ, Ph.D.

Iha audiénsia ne’e, ekipa Centro Chega! introdús kona-ba saida mak Centro Chega!, programa peskiza konjunta no objetivu hosi vizita traballu ne’e.

Hosi parte PUSDEMA nian, reprezenta hosi Kepala PUSDEMA, Dr. Yoseph Yapi Taum, M.Hum, hato’o sira nia entusiazmu no prontidaun ba programa peskiza konjunta ne’e tanba apar ho vizaun no misaun PUSDEMA nian no relevante tebes ho estudu sira-ne’ebé durante ne’e PUSDEMA halo.

Iha audiénsia ne’e mós, PUSDEMA husu ba Reitor Universitas Sanata Dharma (USD), Romo Albertus Bagus Laksana, SJ, Ph.D atu asiña nota entedementu ida ho Centro Chega! ba implementa programa Peskiza Konjunta.

Reitor Universitas Sanata Dharma (USD), Romo Albertus Bagus Laksana, SJ, Ph.D, agradese ba inisiativa no konsidera programa Peskiza Konjunta ne’e di’ak. Universidade Sanata Dharma nakloke no prontu apoia inisiativa refere.

Reitor konta tuir, uluk nia mós hala’o misaun pastoral iha Dili, espesiálmente iha Igreja Balide. Nia komprende situasaun iha momentu ne’ebá, tanba ne’e, programa peskiza konjunta entre Timor-Leste no Indonézia ne’e importante, oinsa ita bele hatene kona-ba memória pasadu no rekonsiliasaun nasaun rua ne’e nian.

Iha loron daruak, 21 Dezembru 2022, Ekipa Centro Chega! hamutuk ho membru PUSDEMA kompostu husi, Dr. Yoseph Yapi Taum, Prof. Novita Dewi, Ph.D, Sra. Wedhowerti, M.Hum no Sr. Patria Budi Sunaryo halo kedas diskusaun no formula esbosu nota entendementu ida atu parte rua, Diretor Ezekutivu Centro Chega!, Hugo Maria Fernandes no Reitor Universidade Sanata Dharma, Romo Albertus Bagus Laksana, SJ, Ph.D sei asiña nota entendementu ida sai hanesan baze legal.

Konteudu hosi ezbosu nota entedementu ne’e rasik, hatuur pontu importante balu iha ninia eskopu kooperasaaun nian ne’ebé inklui koperasaun iha área peskiza, edukasaun no atividade akadémika sira (hanesan semináriu, diskusaun, diálogu, treinamentu, advokasia no publikasaun). Ezbosu ne’e mós hatur PUSDEMA nu’udar implementadór prinsipál no sei envolve Fakuldade no Departamentu relevante sira iha Universidade Sanata Dharma Yogyakarta.

Entertantu, PUSDEMA hanesan instituisaun peskiza ne’ebé foku ba peskiza sobre memória hosi violénsia sira iha pasadu. Instituisaun ne’e hari’i hosi Romo Baskara T. Wardaya, SJ no Dr. Yoseph Yapi Taum. Estudu sira hosi PUSDEMA nian, porezemplu, públika iha livru Memori Genosida: Melihat Kekerasaun Kolektif Masa Lalu dalam Perspektif Holocaust (2021).

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X