CNC-Kebudayaan RI Diskute Programa Interkámbiu Kultural

31

Jakarta, 21 Dezembru 2022 – Delegasaun husi Centro Nacional Chega!I.P (CNC), lidera husi Membru Konsellu Administrasaun, Sisto dos Santos no Diretór Relasaun Esterna, Komunikasaun no Advokasia (DREKA), Gaudencio Soares Souza hasoru malu ho Direktorat Jenderal Kebudayaan Republika Indonesia, Hilmar Farid.

Iha sorumutu ne’e, parte rua, Centro Chega! ho Kebudayaan Republik Indonesia diskute kooperasaun iha programa interkámbiu kultural entre Timor Leste no Indonézia.

Husi diskusaun ne’e, parte rua konklui, estabelese kooperasaun iha programa interkámbiu kultural ne’ebé sei involve foinsa’e sira husi nasaun Timor Leste no Indonézia ne’ebé iha kreatividade ba arte.

Direktur Jenderal, Hilmar Farid hato’o katak, inisiativa atu halo interkámbiu kultural importante tebes ba foinsa’e sira husi nasaun Timor Leste no Indonézia, tanba liuhusi atividade ida ne’e bele hamosu interasaun ne’ebé metin entre foinsa’e sira no sai oportunidade ba sira hodi aprende kultura no istoória nasaun rua ne’e nian, atu nune’e bele kontribui hodi melloria kreatividade no kualidade foinsa’e sira nian.

Iha diskusaun ne’e, parte rua konkorda atu realiza sorumutu ne’ebé envolve mos akademista no peskizadór sira hodi dezenña planu, nune’e bele halibur materia sira ne’ebé iha relevansia ho kultura no istória atu sai konteudu ne’ebé kreativu iha programa interkámbiu kultural.

Alende, interkambiu kultural, pontu importante seluk husi enkontru ne’e, parte rua halo mós diskusaun kona-ba posibilidade Timor Leste atu estabelese Sentru Kultura iha Indonézia, nune’e bele sai espasu ba aprendijazen kultura no Istoória Timor Leste nian.

Liga ho asuntu importante sira ne’ebé sai pontu diskusaun, Direktur Jenderal Hilmar Farid salienta katak iha tempu badak nia parte sei halo mós vizita ba Timor Leste hodi halo diskusaun ne’ebé klean ho Centro Nacional Chega!I.P.

Entertantu, Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”.

No Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X