CNC Ho CI Realiza Formasaun Peace Journalism ba Jornalista sira

75

Maubisse – Atu hasa’e konsiénsia jornalista nia kona-ba paz, Centro Nacional Chega!I.P liu hosi Divizaun Relasaun Externa, Komunikasaun Advokasia (DREKA) servisu hamutuk ho Conselho de Imprensa de Timor-Leste oferese formasaun Jornalizmu ba Paz (Peace Journalism) ba jornalista sira. Jornalista sira ne’e mai husi Media sira hanean Jornál Independete, Timor Post, Dili Post, STL, RTTL E.P, TVE, Gardamor TV, Lafaek News, Tatoli I.P, Smnews, Naunil, Loluwari, Oecusse Post, Neon Metin no mós Radiu Komunidade sira ho totál ema-na’in 36.

Tema ba formasaun ne’e mak “Jornalizmu ba Paz: Promove no Proteze Direitus Umanus Hodi Kontribui ba Paz no Estabilidade Iha Rai Laran”. Formasaun la’o durante loron rua (30 – 31 Marsu 2022) no fasilita husi profesionais média husi Conselho Impresa (CI), Alberico da Costa Junior no Maria Bibel.

Diretór Ezekutivu Centro Chega!, Hugo Maria Fernandes iha abertura formasaun hatete, formasaun Peace Journalism ne’e realiza tanba Centro Chega! ho CI hakarak valoriza knar jornalista sira iha Timor-Leste tanba sira nia partisipasaun no kontribuisaun ba luta ukun rasik-an no dezenvolvimentu nasionál importante.

Nune’e, CNC no CI valoriza jornalista liuhosi atividade formasaun ba jornalista sira atu kontinua hametin sira nia kapasidade no abilidade iha promosaun direitus umanus nian. Alende ne’e liu hosi atribuisaun premiu Maria gorreti ba jornalista sira.

“Eventu ida hanesan ne’e nu’udar komponente ida husi atividade ne’ebé mak CI no CNC halo depois promove jornalizmu ba paz liu-liu hametin kapasidade jornalista sira nian atu iha liu-tan konsiénsia ne’ebé mak di’ak kona-ba saida mak paz no saida mak direitus umanus, no saida mak jornalista sira bele halo hodi promove asuntu direitus umanus”, dehan Hugo iha Salaun Paroquia Imaculado de Maria Maubise-Ainaro, Kuarta-feira, (30/03/ 2022).

Iha fatin hanesan, Jestór Radiu Komunidade Tokodede-Liquiça, Eduardo T. Exposto hateten, sente kontente tebes ba formasaun ida ne’e, tanba liuhosi formasaun ne’e, bele aprende kona-ba oinsá bele kobertura ba paz. Tuir nia, jornalista sira barak seidauk kontribui ba Paz. Ita haree iha kampaña iha fatin-fatin lider politiku sira uza liafuan trata malu, ita kontinua kobertura no halo publikasaun nafatin.

Ho problema ne’e, Eduardo rekomenda ba CNC no CI, atu bele kontinua kapasita nafatin jornalista sira iha futuru kona-ba formasaun paz ho topiku diferente atu nune’e jornalista sira bele iha koñesimentu hodi kontribui ba paz no dezenvolvimentu nasionál.

Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X