Centro Chega! Sei Oferese “Uma Da Memória À Esperança” 11 Ba Sobrevivente Vuneravel liu

27

Dili – Centro Nacional Chega!I.P nu’udar institutu públiku ida ne’ebé estabelese ho Dekretu lei nú. 48/2016 no tutela direitamente ba Primeiru Ministru, no Instituisaun ne’e iha tempu badak nia laran sei harii “Uma da Memória à Esperança” hamutuk sanulu resin ida (11) ba sobrevivente vulneravel sira nu’udar programa reparasaun.

Diretór Centro Nacional Chega!I.P Hugo Maria Fernandes informa, Centro Chega! ho Asosiasaun Vítima Konflitu Polítiku 1974-1999, asina Nota Entendementu ho objetivu hodi fó apoiu orsamentu ba sira hodi halo Uma Memória Á Esperança ba sobrevivente sira, liu-liu ba sira ne’ebé mak vulneravel liu ne’ebé iha tempu uluk sai vítima ba konflitu pasadu Timor no ohin loron moris iha kondisaun uma ladi’ak.

“Centro Chega! sei halo transferensia osan ba iha asosiasaun vítima hodi harii uma 11 ba sobrevivente ho vítima sira ne’ebé identifika ona no halo ona verifikasaun iha teritoriu Timor laran”, dehan Diretór liu husi Konferénsia Imprensa ne’ebé hala’o iha edifisiu Centro Chega! Balide, Dili, Sexta (24/09/2021).

Hugo haktuir, uma ne’ebé Centro Chega! apoia nu’udar programa reparasaun ne’ebé sita iha Relatóriu Comissão de Acolhimento, Verdade e Reconciliação (CAVR) liu-liu dignifika sobrevivente no vítima sira iha konflitu polítiku 19774-1999.

Nune’e, Centro Chega! iha esperansa katak, tinan ida ne’e, uma 11 ne’ebé Centro Chega! oferese ba vítima no sobrevivente sira bele tulun sira, hodi rekopera sira nia kondisaun uma mak oras ne’e ladi’ak ona.

Totál orsamentu ne’ebé alokadu ba konstrusaun uma vítima no sobrevivente sira hamutuk Rihun Atus Ida Neennulu resin Sia, Atus Haat Tolunulu resin Tolu, sentavus Ualunulu dollar Amerikanu (USD 169,433.80).

Kordenadór Nacional Asosiasaun Vítima Konflitu Polítika 1974-1999 Domingos P. de Araujo Moniz reforsa, tuir dadus ne’ebé asosiasaun vítima identifika, vítima no sobrevivente sira iha Munisípiu ho kondisaun uma ne’ebé ladi’ak no presiza apoiu urjente hamutuk 11 mak hanesan; Munisípiu Lautem 3, Viqueque 1, Ainaro 2, Covalima 1, Dili 2 no Liquiça 2. Kona-ba Munisípiu sira seluk, nia hatan, sei iha faze verifikasaun tanba verifikasaun ne’e halo husi Asosiasaun Vítima hamutuk ho Centro Chega!.

Nia informa, uma ne’ebé Centro Chega! harii ba vítima no sobrevivente sira nia medida hanesan hotu-hotu hetan 7×9, maibé ida mak 5×6 tanba rai nia luan lato’o. Husu kona-ba kualidade konstrusaun uma, hanesan koordenador asosiasaun vítima garante uma sei iha kualidade tanba hetan kontrolu husi Centro Chega! no Asosiasaun Vítima no apoiu husi autoridade lokál, komunidade inklui família vítima no sobrevivente.

Entertantu, durasaun akordu ba apoiu ne’e lavinkula entre partes bainhira benefisiariu submete ona relatóriu narativu no relatóriu finanseira originál ho lolos no kredivel, kompleta ho dokumentus, fotografia no video.




Leave a Reply

Your email address will not be published. Required fields are marked *

error: Alert: Chega! Area Protejidu!
X