Centro Chega! Sei Hetan Apoiu Millaun Lima Husi KOICA Durante Tinan 5

66

Dili – Centro Nacional Chega! nu’udar institutu públiku ida ho nia natureza autonomia administrasaun, finanseiru no patrimóniu ne’ebé tutela diretamente ba Primeiru Ministru, kontinua halo kooperasaun servisu parseria multilateral ho Ajensia Internasionál KOICA, no UNESCO ne’ebé ho objetivu apoiu finanseiru ba Centro Chega atu hala’o nia atividade sira.

Diretór Ezekutivu Centro Chega! Hugo Maria Fernandes informa, enkontru ne’ebé realiza iha 16 Setembru 2021entre Centro Chega! no KOICA hodi deskute kona-ba rezultadu proposta apoiu finanseiru ne’ebé KOICA sei fó ba Centro Chega! hamutuk Millaun Lima no orsamentu ne’e sei fó durante tinan 5 nia laran hahú husi 2021 to’o 2025.

“Parseria ida ne’e sei halo durante tinan lima. Iha loron 16 Setembru 2021 sei iha uluk nota entendementu entre KOICA no UNESCO, hafoin ida ne’e mak sei iha fali asinatura konkordansia entre KOICA ho Centro Chega! no mós sei iha tan asinatura konkordansia entre KOICA no UNESCO”, dehan Diretór Hugo iha nia kna’ar fatin iha Antigo Comarca Balide, Dili. 

Nia haktuir, osan ne’ebé KOICA fó, sei uza ba programa boot tolu, ida mak atu tulun dezenvolve arkivu nian tanba arkivu istóriku ne’ebé iha nia atividade detallu komesa husi rehabilitasaun ba sentru arkivu no digitalizasaun. Segundu, apoiu ba implementa programa sira relasaun ho introdusaun konteudu Relatóriu Chega! no Per Memoriam Ad Spem iha kurikulum ensinu, partikularmente iha kurikulum ensinu primaria no pre-sekundaria, inklui produsaun materia edukativu sira. Tolu mak atu apoiu Centro Chega! iha estabelesementu Centru Rezolusaun Konflitu iha Timor ne’ebé mak bele sai mós hanesan sentru ida iha rejiaun ida ne’e, ne’ebé ema ba aprende kona-ba pasadu nian, haree mekanizmu rezolusaun konflitu politiku pasadu.

Maibe nia intensaun mak sai nu’udar sentru exélente ida iha rejiaun ne’e no sei iha programa no atividade sira iha relasaun no estabelese parseria ho sentru sira hanesan iha rejiaun, iha programa interkambiu, estudus, konferensia iha Timor no mos iha pais sira seluk.

Entertantu, enkontru ne’e partisipa husi Country Director Eunju Cha no Program Manager, Haejung Yoon no Marcos da Costa Dias husi KOICA.




Leave a Reply

Your email address will not be published. Required fields are marked *

error: Alert: Chega! Area Protejidu!
X