Centro Chega! no MTCI Aliña Planu Servisu no Orsamentu ba Sítiu Istóriku

82

Diretór Ezekutivu Interinu Centro Nacional Chega!IP Sr. Metodio Caetano Moniz akompañia husi Diretór Divizaun Relasaun Esterna Komunikasaun no Advokasia (DREKA) Sr. Gaudencio Soares Souza no Xefe Divizaun Perkiza no Arkivu Istóriku (DPAI) Sr. Aventino de J. B. Ximenes halo enkontru ho Diretor Jeral Turismu Sr. Celino Soares iha Farol-Dili.

Objetivu husi enkontru mak atu aliña planu servisu hamutuk haktuir Nota Entendementu entre instituisaun rua atu nune’e bele integra di’ak liu tan iha planu orsamentu no atividade iha tinan 2022 iha ámbitu protesaun no promosaun sítiu istóriku no formasaun ba tour guide sira.

Iha enkontru ne’e parte rua konkorda hamutuk atu fahe tarefa iha planu orsamentu no atividade sira tuir ida-ida nia knar. Nune’e parte rua konkorda atu orsamentu iha planu asaun 2022 hodi rehabilita no kompleta instalasaun memória istóriku ba sítiu 5 husi sítiu istóriku 10 ne’ebé identifika ona hanesan sítiu di’ak liu ba atrai turista lokál, nasionál no internasionál.

Sítiu 5 (lima) husi sítiu (10) sanulu ne’ebé ekipa parte rua konkorda hodi proposta ba rehabilitasaun no instalasaun memória istóriku mak Casa Europa, Câmara Eclesiástica, Shan Tai Hoo, Uma Adat Tasi Tolu no Eis Polres Dili. Aleinde ne’e parte rua mos konkorda atu halo promosaun hamutuk ba sítiu istóriku sira no sei orsamenta mos iha planu asaun 2022 ba formasaun tour guide ba vítima ka familia vítima sira hodi nune’e bele tulun fasilita turista sira ne’ebé vizita sítiu istóriku sira. Enkontru koordenasaun sei kontinua la’o entre parte rua to’o hetan desizaun finál.




Leave a Reply

Your email address will not be published. Required fields are marked *

error: Alert: Chega! Area Protejidu!
X