Centro Chega! no Ministériu Saúde Konkorda Malu Halo Tratamentu Saude Urjente ba Vítima no Sobrevivente

152

Dili – Centro Nacionál Chega! no Ministériu Saúde realiza ona sorumutu ida iha loron 30 Jullu 2021, hodi diskute kona-ba Tramentu Saúde ba Vítima no Sobrevivente husi Violasaun Direitus Umanus husi tinan 1974 – 1999, ne’ebé to’o agora sei moris iha situasaun terus no moras nia laran.  Sorumutu ne’e partisipa husi Diretór Ezekutivu Centro Chega! husi Hugo Maria Fernandes ho Diretór Divizaun no Xefe Departamentu sira ho Diretór Jerál Ministériu Saúde ho Diretór Nasionál sira iha Salaun Enkontru Palasiu da Sinzas, Caicoli, Ministériu Saúde, Dili.

Diretór Ezekutivu Centro Nacional Chega! hateten Rekomendasaun boot ida husi Relatóriu Chega! mak Reparasaun ba Vítima no Sobrevivente sira, nune’e husu ba Ministériu Saúde (MS) atu halo taratmentu saúde urjente ba sobrevivente sira ne’ebé hetan violasaun direitus umanus iha tempu passadu tanba sira nia kondisaun saúde fíziku no mentál oras ne’e ladiak.

“Ami haree katak intendementu ba tratamentu saúde ba sobrevivente sira mak urjente”, informa Hugo iha enkontru ne’ebé akompaña husi Diretór Divizaun Finansas Operasional (DFO), Metodio Caetano Moniz, Diretor Divizaun Relasaun Externa Komunikasaun no Advokasia (DREKA) Gaudencio Soares Souza, Diretór Divizaun Solidariedade Sosial (DSS), Nelson Miranda Seixas, Diretór Divizaun Edukasaun no Formasaun (DEF), Vicente Borges Maia inklui Xefe Departamentu sira husi Centro Chega!

Husi Centro Chega! nia hanoin katak, atendementu saúde ba sobrevivente sira ne’ebé hetan violasaun direitus umanus iha tempu passadu hanesan mós halo tratamentu ba veteranu sira tanba uluk sira mós hetan torturasaun no violasaun oin-oin hasoru sira.

Tanba ida ne’e haktuir husi Relatóriu Rekomendasaun Chega! no PMAS (Per Memoriam Ad Spem) sira ne’ebé hateten katak governu fó apoiu ba vitima sira husi violasaun direitus umanus pasadu ne’ebé mak to’o agora kontinua moris iha kondisaun vulneravel nia laran.

Responde ba kestaun ne’e, Diretór Nasional Apoiu Servisu Ospitalar, Doutor Nilton do Carmo da Silva dehan, Ministériu Saúde iha programa hodi fó atensaun espesiál ba veteranu sira tanba ne’e ba oin sei fó atensaun hanesan ba sobrevivente sira.

“Ami hanoin katak programa ne’ebé halo ba veteranus sira ita bele duplika ou kria unidade ida ne’ebé mak fó atensaun ba sobrevivente sira. Ita bele integra hamutuk, define ninia mekanizmu bele iha ospital nasional ou klinika ruma”, nia sujere.

Nia esplika, kona-ba atendimentu saúde ba sobrevivente sira, programa ne’e bele integra iha programa saúde na família tanba programa ne’e integradu no fasil hodi halo monitorizasaun ba sira nia kondisaun tanba sei hahú uluk halo screening ba sira nia kondisaun. 

Entretantu, Diretora Jerál Prestaun Saude Ministériu Saúde, Dra. Odete Viegas hateten, parte husi Ministériu Saúde agradese ba Centro Chega! tanba bele partilla ona informasaun atu bele servisu hamutuk oinsá atu haree ba asuntu saúde sobrevivente sira nian.

Planu sira ne’ebé Centro Chega! halo ne’e di’ak tebes tanba bele komplementa tan saida mak Ministériu Saúde halo no parte Ministériu Saúde hanoin katak atendementu saúde ba sobrevivente sira ne’e sei hanesan mos atendementu ba veteranu sira.

Nia afirma, ba oin Centro Chega! no Ministériu Saúde bele asina nota entendementu ida atu bele fó atensaun ba preokupasaun Centro Chega! nian.




Leave a Reply

Your email address will not be published. Required fields are marked *

error: Alert: Chega! Area Protejidu!
X