Centro Chega! no Ministériu Saúde Estabelese Kooperasaun Hodi Fó Asisténsia ba Vítima/Sobrevivente

47

Dili – Centro Nacional Chega!I.P no Ministériu Saúde (MS), iha loron Sexta-Feira, (03/09/2021) ne’e, ofisialmente asina ona Nota Entedementu ne’ebé ho objetivu atu fó asisténsia saúde ba vítima no sobrevivente konflitu pasadu ne’ebé oferese sira nia vida tomak ba libertasaun nasionál.

Diretór Ezekutivu Centro Nacional Chega!I.P Hugo Maria Fernandes informa, Nota Entendementu ne’ebé Centro Chega! ho Ministériu Saúde asina ona, ko’alia mós kona-ba fó tratamentu saúde ba sobrevivente sira no mós harii sentru rehabilitasaun ba sobrevivente sira tanba sobrevivente sira balun la’ós moras fíziku de’it, maibé mós balun moras mentál.

“Ami nia responsabilidade mak prepara dadus, kartaun, liu husi kartaun ne’e mak orsida ami sei haruka ba Ministériu Saúde ba iha Postu Saúde, Ospital Referál no nasionál sira. Nune’e pesoál saúde identifika no halo atendementu”, dehan Hugo liu husi konferénsia imprensa ne’ebé hala’o iha Edifisiu Centro Chega! Antigo Comarca Balide, Dili.

Nia haktuir, tuir baze dadus ne’ebé mak Centro Chega! iha, provizoriamente sobrevivente kuaze rihun rua no iha dadus ne’e sei halo agregasaun katak sei identifika didi’ak sobrevivente sira ne’ebé mak mais vulnerabel liu katak sira presiza tebes halo tendementu saúde fíziku no saúde mentál.

Kona-ba fatin ka Sentru rehabilitasaun, Hugo dehan, fatin sentru saúde sira iha munisípiu ne’e iha, maibé seidauk iha fasilidade ne’ebé kompletu, entaun presiza de’it mak fornese fasilidade sira ne’ebé presiza.

Antes ne’e, Centro Chega! mós halo ona kooperasaun ho Asosiasaun Vítima no mós PRADET hodi halo parseria servisu no fó atendementu ba sobrevivente sira ne’ebé mak iha kondisaun saúde mentál ladun di’ak. Tan ne’e, atu asegura nota entedementu ne’ebé Centro Chega! ho MS halo ba iha implementasaun Centro Chega! sei ajuda hodi hala’o servisu iha baze.

Nune’e mós, Ofisiál Solidariedade Sosiál Ana Soares informa katak, relasiona ho sobrevivente ne’ebé hetan moras mentál, durante Centro Chega! rekolla no halo rejistu ba sobrevivente sira, hafoin rekomenda ba PRADET hodi halo tratamentu saúde mentál  no numeru ne’e hamutuk ema na’in 26.

Entertantu, Nota Entendimentu ida ne’e husi parte Ministériu Saúde (MS) asina tiha ona antes tanba impaktu husi surtu Covid-19 no Centro Chega! foin asina iha loron Sexta, 03 Setembru 2021, no akordu ne’e válidu ba periodu tinan rua (2).




Leave a Reply

Your email address will not be published. Required fields are marked *

error: Alert: Chega! Area Protejidu!
X