Centro Chega! ho MEJD Halo Avaliasaun Rapida ba Implementasaun Chega! iha Kurikulu

41

Dili – Centro Nacional Chega! I.P (Centro Chega!) nu’udar Institutu Públiku ida ne’ebé tutela diretamente ba Primeiru-Ministru hamutuk ho Ministériu Edukasaun Juventude no Desportu (MEJD) halo avaliasaun rapida preliminariu ba implementasaun Chega! iha Kurikulu Ensinu Báziku Siklu Daruak ba Materia Siénsia Sosiais liu-liu konteúdu Edukasaun Sívika no Direitus Umanus ne’ebé durante ne’e hanorin iha eskola.

Objetivu husi avaliasaun mak atu haree dezafiu no progresu sira ba implementasaun Chega! iha Kurikulu Ensinu Báziku Siklu Daruak tanba dixiplina rua ne’e implementa ona iha 2015, no iha 2021 kompleta ona tinan 5.

Diretór Ezekutivu Centro Nacional Chega!I.P Hugo Maria Fernandes iha nia abertura hato’o agradesimentu ba MEJD tanba kontinua halo kooperasaun di’ak ho Centro Chega! hodi hadia kontiúdu sira husi materia Siénsia Sosiais liu-liu konteúdu Edukasaun Sívika no Direitus Umanus.

Iha tempu hanesan, Diretór Divizaun Edukasaun no Formasaun (DEF)iha Centro Chega! Vicente Maia Borges esplika, avaliasaun ba implementa Chega! iha kurikulum ne’e importante tebes, atu bele haree dezafiu no progresu sira ne’ebé durante ne’e professór sira infrenta, nune’e fó hanoin atu hadia iha futuru.

“Buat ruma ita presiza hadia, hodi asegura katak Rekomendasaun Chega! ne’e implementa duni iha edukasaun no ita nia jerasaun foun sira hatene istória pasadu no violasaun ba direitus umanus, hodi atinji metas katak, ita tenke promove la’e ba violénsia, promove respeitu direitus umanus no labele repete violasaun direitus umanus iha futuru”, dehan Vicente iha Edifisiu Centro Chega! Antigo Comarca Balide, Dili, Sexta (17/09/2021).

Entretantu, Koordenadór Ensinu Baziku Filial Hera Gilberto Hornai informa, implementasaun Relatóriu Chega! iha kurikulu Ensinu Báziku liu-liu ba materia siénsia sosiais espesífiku istória Timor-Leste ho Direitus Humanus oras ne’e, hanorin ona estudante sira iha ensinu b’aziku fili’al Hera no durante ne’e la’o ho di’ak.

Maibé iha mos dezafiu sira ne’ebé sai impedementu ba prosesu aprendisajen mak tempu no tanba Timor-Leste enfrenta situasaun pandemia Surtu Covid-19 ne’ebé eskola taka beibeik, entaun professór sira halo rezumu materia no hanorin labele hotu.

Nia sujere ba Centro Chega! no MEJD atu hakerek istória ne’e ho kompletu tanba tuir nia istória ne’ebé iha seidauk kompletu no husu atu kompletu liu tan tanba lider istóriku sira seidauk hato’o sira nia istória.

Workshop ne’e partisipa husi MEJD Dirasaun Ensinu Baziku no Diretor ho Koordenador Eskola Ensinu Baziku sira husi Munisípiu Dili. Total partisipante hamutuk na’in 33.

Husi semináriu ne’e hamosu rekomendasaun 4 mak hanesan: 1. Rekomenda ba Centro Nacional Chega! presiza iha kooperasaun di’ak liutan ho Ministério Educação Juventude e Desporto-MEJD liu hosi INFORDEPE hodi fó formsaun kontínua espesífika kona-ba konteúdu Edukasaun Sívika no Direitus Umanus. 2. Rekomenda ba MEJD no Centro Nacional Chega! atu prodúz manuál eskolá ba profesór no estudante sira ho sufisiente atu distribui ba eskola hotu tanba eskola seidauk iha manuál hirak ne’e atu hanorin. 3. Rekomenda ba Centro  Nasional Chega! atu produz tan livru matadalan  espesífika ida kona-ba konteúdu Edukasaun Sívika no Direitus Umanus no relatóriu Chega! ba eskola sira atu fasilita profesór sira hodi halo konsultasaun bainhira hasoru difikuldade. 4. Rekomenda ba Centro Nacional Chega! fornese formasaun espesíka ba konteúdu konsultada ba profesór sira, prezisa produz livru manuál formasaun ida bazeia ba temátika sira ne’ebé destaka ona iha dixiplina Siénsia Sosiais ida ne’e atu bele responde nesesidade profesór sira nian iha dixiplina ne’e rasik.




Leave a Reply

Your email address will not be published. Required fields are marked *

error: Alert: Chega! Area Protejidu!
X