Centro Chega! Halo Lansamentu Fatuk Dahuluk UME ba Sobrevivente Manuel, Iha Liquiça

20

Liquiça – Centro Nacional Chega!I.P liuhusi Divizaun Solidariedade ba Sobrevivente (DSS) ho Asosiasaun Vitíma Konflitu Polítiku 1974-1999 hamutuk ho Reprezentante Autoridade Postu Administrativu Maubara halo lansamentu fatuk dahuluk Uma husi Memória ba Esperansa (UME) ba Sobrevivente, Manuel Sanches Ramos, iha Aldeia Vatunau, Suku Vatuvou, Postu Administrativu Maubara, Munisipiu Liquiça.

Sobrevivente Manuel hetan UME, tanba uluk fó kontribuisaun luta ba ukun rasik-an no hetan violasaun direitus umanus pasadu no agora sai difisiente fiziku tanba hetan ta’a husi Milisia sira parte liman. Manuel kaben ho Maria Nunes iha oan nain 5, mane 2 no feto 3, hela iha uma ho kondisaun ne’ebé lafavoravel.  

Moris hanesan ema difisiente fiziku, lalakon vontade kontinua buka dalan oin-oin, buka osan hodi sustenta uma laran liuhusi atividade ta’a ai-maran no fa’an. Ai ne’ebé nia fa’an loron ida hetan $ 2 to’o $ 3. Atividade fa’an ai-maran huhú kedas iha tinan 2000 to’o ohin loron.

Sobrevivente ne’e haktuir, ida ne’e mak nia servisu loron-loron, laiha-tán servisu seluk ne’ebé nia atu halo. Osan ne’ebé nia hetan mak uza hodi sosa ba nesesidade lorloron nian no sosa oan sira nia fasilidade eskola inklui selu transporte.

Ho apoiu ne’ebé Centro Chega! fó ba Sobrevivente Manuel hodi halo UME, Reprezentante Diretór Ezekutivu Centro Chega!, Nelson Seixas Miranda esplika, Centro Chega! halo UME ba sobrevivente Manuel ne’e la’os kariedade, maibé ne’e nu’udar direitus no maneira ida atu dignifika no valoriza nia kontribuisaun luta ba ukun rasik-an.

Apoiu ne’ebé Centro Chega! fó nu’udar apoiu estadu no Governu nian liuhusi Centro Chega!. Halo UME ba sobrevivente nu’udar programa Centro Chega! nian responsabiliza husi DSS. Programa ida ne’e implementa ona iha tinan kotuk (2021) no iha tinan ida ne’e (2022) ita sei halo-tán uma 5 ba sobrevivente na’in 5 husi Munisipiu 4 inklui RAEOA. Munisipiu haat mak hanesa; – Liquiça, Aileu, Covalima, Manufahi no RAEOA (Rejiaun Administrativu Espesial Oe-cuse Ambeno).

“Tanba saida mak maun Manuel ne’e hetan, tanba maun nia kontribuisaun ba prosesu naruk to’o nasaun ne’e hetan independensia. CNC hanoin katak, nia merese duni hetan,” dehan Reprezentante Diretór Ezekutivu Chega!, Nelson iha serimónia lansamentu fatuk dahuluk UME ba sobrevivente Manuel, iha suku Vatuvou-Liquiça, Kuarta-feira, (09/11/2022).

Uma ne’e ho medida 9×7, kompostu husi, Kuartu 3, sala 1, haris fatin 1, varanda 1 no mós dapur, kompleta ho instalasaun eletrisidade, plafon no keramik, exeptu dapur. Uma ne’e programa Centro Chega! nian no konstrui uza Orsamentu Jerál Estadu (OJE) ba tinan 2022 ho montante $ 14.800 implementa hosi Asosiasaun Vitíma Konflitu Polítiku 1974-1999 no apoiu husi familia sobrevivente, komunidade no autoridade lokál sira. Tuir tarjetu konstrusaun uma ne’e sei la’o durante fulan 5 nia laran.

Alende ne’e, Koordenadór Ezekutivu Nasionál Asosiasaun Vítima Konflitu Polítiku 1974-1999, Domingos Pinto “Atai” esplika, sobrevivente Manuel hetan UME tanba liuhusi prosesu verifikasaun ne’ebé involve husi autoridade lokál, Centro Chega! no Asosiasaun Vitíma Konflitu Polítiku 1974-1999.

Ohin ita halo lansamentu fatuk dahuluk ba konstrusaun UME ida ne’e tanba Estadu no Governu liuhusi Centro Chega! fó fiar ba Asosiasaun Vítima Konflitu Polítiku 1974-1999  hodi organiza no tau matan ba konstrusaun ida ne’e.

“Ita hotu nia apoiu, hanesan ema katolika ko’alia kariedade, solidariedade labele iha ibun de’it tenke ser iha asaun hatudu ita nia fuan. Hau enkoraja ita boot sira liu-liu joven sira banati tuir buat sira ne’ebé mak uluk ita nia beiala sira hatudu hela, servisu hamutuk fó forsa ba malu,” Koordenadór fó hanoin.

Koordenadór Asosiasaun Vitíma Munisipiu Liquiça, José Serão, lori Asosiasaun Vítima Konflitu Polítiku 1974-1999  munisipiu Liquiça nia naran agradese Centro Chega! tanba halo ona lansamentu fatuk dahuluk ba sobrevivente Manuel.

“Ami espera katak programa ne’e iha kontinuasaun nafatin ba maluk sira ne’ebé mak durante ne’e halerik hela. Sira sente katak sofrementu ne’ebé sira hetan, presiza fó dignifikasaun ba sira. Liuhusi apoiu ida ne’e hanesan direjente hau agradese tomak CNC nomós Autoridade Lokál,” Serão agradese.

Reprezentante Administradór Postu Administrativu Maubara, Augusto dos Santos Soares agradese Centro Chega! no Asosiasaun Vítima Konflitu Polítiku 1974-1999 tanba ita boot sira nia servisu hamutuk ohin loron halo UME ba sobrevivente Manuel, espera katak ba oin sei kontinua apoiu ba sobrevivente sira seluk.

Sobrevivente, Manuel Sanches Ramos, sente kontente no agradese Centro Chega! no Asosiasaun Vítima Konflitu Polítiku 1974-1999 tanba halo ona UME ba nia ho familia sai nu’udar mahon ida hodi hala’o nia atividade loron-loron.

Enkuantu, serimónia lansamentu fatuk dahuluk Uma husi Memória ba Esperansa ba sobrevivente Manuel partisipa husi Xefe Aldeia, Gaspar Alves Correia, komunidade no familia sobrevivente hamutuk na’in 40 resin.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X