Centro Chega! Halo Diseminasaun Informasaun Kona-ba Hatutan Memória ba Estudante Sira

25

Centro Chega! liu husi Divizaun Edukasaun no Formasaun (DEF) halo diseminasaun informasaun kona-ba “Programa Hatutan Memória” ba Estudante Universitáriu no Grupu Voluntáriu sira hanesan RYLA – TL no ICF TL iha Salaun Konferénsia Chega! Antigu Comarca Balide, Dili (19/06/2020). 

Diretora Dezenvolvimentu Instituisional no Rekursu Umanu Maria Arminda Guterres da Costa ne’ebé reprezenta Diretór Ezekutivu Chega!, iha nia intervensaun hateten Centro Nacional Chega! I.P hanesan Institutu Públiku ne’ebé estabelese tuir dekretu lei Nú. 48/2016 ho nia misaun mak ‘’Harii Sentru Post-Konflitu ne’ebé prezerva memória passadu nian hodi promove direitu no valór direitu umanus”.

Maria Arminda hatutan tan katak, Centro Chega! nu’udar sentru aprendizajen no nakloke ba públiku liuliu enkoraja estudante no foin-sa’e sira presiza tebes atu aprende kona-ba istória Timor-Leste nian iha luta ba libertasaun nasionál. 

Programa Hatutan Memória (Transmisaun Memória Interjerasional) ne’e nu’udar aproximasaun edukativa kona-ba istória no memória pasadu, fó biban ba estudante sira ne’ebé iha inisiativa rasik, halo intervista hodi rona direta istória inan-aman ka família sira nian, no biban hodi bele hakerek inan-aman ou família sira nia istória ou familia sira seluk nia sakrifisiu, dedikasaun no kontribuisaun ba luta indepensia nian. 

“Ohin loron ema hatene lider sira nia istória, maibé ladún iha istória kona-ba ema baiban (povu) nia istoria, tanba ne’e liu husi programa ida ne’e hein katak estudante sira sei hakerek istória família nian depois entrega mai no Centro Chega! sei fasilita prezerva ba istória refere, nomos bele kompila ba istória hodi ema seluk bele hetan”, dehan Arminda.




Leave a Reply

Your email address will not be published. Required fields are marked *

error: Alert: Chega! Area Protejidu!
X