Centro Chega! Fasilita Formasaun Jornalizmu Báziku ba Nia Funsionáriu Sira

25

Dili – Atu mellóra servisu no/ka atendimentu ba públiku atravez trazmite informasaun ne’ebé loos, bazeia ba faktu, atuál no kredivel mak Centro Nacional Chega!I.P liu husi Divizaun Dezenvolvimentu Institusional no Rekursu Umanu (DDIRU) organiza Formasaun Jornalizmu Báziku ba nia funsionáriu sira. Formasaun ne’e hala’o durante loron 3, hahú husi loron 20 to’o 22 Setembru 2021, iha Salaun Konferénsia Centro Chega! Antigo Comarca Balide – Dili ne’ebé fasilita husi Conselho Imprensa Timor-Leste.

DDIRU koordena ho Conselho Imprensa hodi fasilita formasaun jornalizmu báziku ba funsionáriu Centro Chega! ne’ebé minimu kobre difinisaun no/ka ambitu jornalistika, prinsípiu ka valór notísia sira, métodu hakerek notísia (hahú husi identifika asuntu, fonte informasaun, tékniku entervista, halo kobertura, define anglu, hakerek títilu, lead notísia, no/ka to’o konteúdu tomak), kodigu étika jornalizmu, no mos báziku kona-ba jestaun redasaun media nian.

Diretór Ezekutivu Centro Nacional Chega!I.P Hugo Maria Fernandes informa, objetivu prinsipál husi formasaun mak atu hasa’e koñesimentu funsionáriu sira iha área jornalizmu no mós enkoraja funsionáriu sira atu habitua hakerek notísia.

“Formasaun ne’e importante tebes ba funsionáriu sira ne’ebé servisu iha programátiku atu bele hatene hakerek atividade sira”, dehan Hugo iha abertura formasaun ne’ebé realiza iha salaun konferénsia, Antigu Comarca, Balide, Dili, Segunda-Feira, (20/09/2021).

Diretór mos enkoraja partisipante sira hodi aproveita oportunidade formasaun ne’e ho didi’ak, nune’e bainhira remata formasaun bele implementa iha servisu lorloron liliu oinsá mak atu dokumenta no rekorda eventu sira ne’ebé programátiku sira halo iha terreñu, no oinsá mak iha memória pesoál ne’ebé sai nu’udar memoriál karik laservisu ona iha Centro Chega!.

Iha sorin seluk, Diretóra Divizaun Dezenvolvimentu Institusionál no Rekursu Umanu (DDIRU) Maria Arminda esplika, formasaun ne’e hola parte ba dezenvolvimentu instituisionál rekursu umanu tuir planu asaun 2020-2021 nian.

Entertantu, formasaun ne’e fasilita husi Diretór Analiza no Dezenvolvimentu Media (DADM) iha Conselho Imprensa Alverico da Costa Junior ho partisipante kauze funsionáriu na’in 30.




Leave a Reply

Your email address will not be published. Required fields are marked *

error: Alert: Chega! Area Protejidu!
X