Centro Chega! Entrega Xave Uma “Da Memória À Esperança” Ba Sobrevivente Duarte

61

Dili – Centro Nacional Chega!I.P hamutuk ho Asosiasaun Vitima Konflitu Polítiku 1974-1999 realiza serimonia ko’a fita no entrega xave uma “Da Memória À Esperança” ba sobrevivente Duarte Agusto Soares ho família iha Aldeia Nahaek, Suku Dare, Postu Administrativu Vera Cruz, Munisípiu Dili.

Uma ne’e, ho medida 9 x 7 m2, kompostu husi, Kuartu 3, sala 1, haris fatin 1, varanda 1 no mos dapur, kompleta ho instalasaun eletrisidade, plafon no keramik, exeptu dapur ho totál kustu $ 14.800 inklui ona selu badae.

Diretór Ezekutivu Centro Chega!, Hugo Maria Fernandes informa, tinan 2021 Centro Chega! hari’i uma “Da Memória À Esperança” ba sobrevivente no vitima sira husi konflitu polítiku pasadu ne’ebé iha kondisaun saúde fiziku no ekonomia mukit liu.

Tinan ida ne’e (2022), husi uma 10, uma 1 iha Maubara, Primeiru Ministru (PM) Taur Matan Ruak rasik inagura tiha ona, no ohin entrega tan xave ba Duarte nu’udar sobrevivente ida husi levantamentu Marabia iha 10 Juñu 1980.

“Uma ne’e halo ho intensaun fó dignifikasaun ba sobrevivente no vitima sira ne’ebé mak iha tempu okupasaun Indonézia partisipa, sai vítima ba okupante militár Indonézia nian”, dehan Diretór Hugo ba jornalista sira iha Nahaek-Dili, Tersa-feira (01/03/2022).

Hugo haktuir, halo uma “Da Memória À Esperança” ba sobrevivente no vítima sira nu’udar komponente importante ida husi reparasaun, tanba Centro Chega! nu’udar Institutu Públiku ne’ebé responsavel atu tau matan ba sobrevivente sira.

Entaun, ita hari’i uma ida ne’e sai modellu reparasaun ida ba sobrevivente sira no importante liu hosi prosesu hari’i uma ida ne’e mak solidariedade husi komunidade sira husi Aldeia Nahaek, Suku Dare nian mak hodi apoiu ba hari’I uma ida ne’e.

Uma ida ne’e nu’udar Jestu, oinsá estadu RDTL liu hosi Centro Chega! no mos liu hosi OJE nian hatudu nia solidariedade, rekoñesimentu ba sobrevivente sira nia memória pasadu ne’ebé mak sira sai hanesan vítima ba konflitu polítiku.

Koordenadór Asosiasaun Vítima Konflitu Polítiku 1974-1999, Domingo P. de Araujo Moniz, lori sobrevivente no vítima sira nia naran hato’o agradesementu ba Centro Chega! ba apoiu uma “Da Memória À Esperança” ba sobrevivente Duarte ho família.

Domingo salienta, sobrevivente Duarte ho família merese hetan uma “Da Memória À Esperança” tanba nia sai vítima ba konflitu polítiku, nia envolve iha levantamentu Marabia iha tinan 1980 no ohin loron nia hetan moras mentál.

Lucia de Fatima Souza nu’udar sobrevivente Duarte Agusto Soares nia fen, hato’o sentimentu kontente tanba bele hetan apoiu uma “Da Memória À Esperança” ba sira sai nu’udar mahon ida ba sira iha tempu agora no ba futuru.

Enkuantu, serimonia ne’e partisipa husi Autoridade lokál, Diretór Ezekutivu ASEPPOL no komunidade sira.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X