Centro Chega! Elabora Planu Estratéjiku 2021-2025 ho Parseiru Sira

30

Centro Nacional Chega!I.P, iha loron 8 Jullu 2021 realiza ona workshop ida hodi elabora planu estratéjiku Centro Chega! nian ba tinan 2021-2025 hamutuk ho pareiru estratéjiku sira. Workshop ne’e realiza iha Salaun Konferénsia Centro Nacional Chega!, Antigo Comarca Balide – Dili, enkuantu Parseiru estratéjiku sira ne’ebé partisipa iha workshop ne’e mai husi Ministériu sira hanesan MEJD, MESCC, MSSI, MS, MJ, MNEK, MI, MTCI, MAE, nune’e mós parseiru sira husi INAP, UNPAZ, UNTL, UNDIL, DIT, PDHJ, AJAR, ACBIT, PRADET, RYLA-TL, CI, G7+, ASSEPOL no seluk tan.

Diretor Ezekutivu Centro Nacional Chega!I.P, Sr. Hugo Maria Fernandes informa, Centro Nacional Chega! I.P, Da Memória À Esperança (Centro Chega!) nu’udar institutu publiku mak estabelese atravez dekretu Lei no. 48/2016, ho nia vizaun sosiedade ida mak inkluzivu, larepete istória passadu nian, moris iha dame, no respeitu ba direitus umanu, no nia misaun mak harii Centro Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun CAVR no CVA ne’ebé relevante, nune’e atu atinji vizaun ne’e mak, Centro Chega! realiza workshop hodi elaborasaun planu estratéjiku Centro Chega! nian 2021-2025 hamutuk ho pareiru estratéjiku sira atu identifika progresu, dezafius no oportunidade sira ne’ebé Centro Chega! iha no hadia ba oin.

Nia haktuir, elaborasaun planu estratéjiku ne’ebé Centro Chega! halo liu husi konsultasaun ho parseiru estratéjiku sira ho objetivu atu identifika progresu, dezafius no oportunidade sira ne’e foti sai planu estratéjiku ba tinan haat (2021-2025).

“Ami tenke halo elaborasaun ba planu estratéjiku. Planu estratéjiku ida uluk iha 2017 to’o 2022 prosesu sira la’o mai sirkunstansia barak loos. Ami hanoin katak ami presiza hakotu ona planu estratéjiku 2017 no 2022 para halo elaborasaun planu estratéjiku foun”, dehan Diretór Hugo iha abertura workshop, iha salaun Konferénsia Centro Chega! Antigo Comarca Balide – Dili.

Tanba ne’e, nia fiar katak, ho diskusaun kona-ba identifika issu estratéjiku sira ne’ebé mak identifika progresu, dezafius no oportunidade sira ne’e bele hamosu planu estratejia foun ba iha tinan haat 2021-2025.

Iha fatin hanesan, Reprezentante Ministériu Interiór Asesor Prinsipál Sr. Jose Turquel konsidera Centro Chega! nu’udar instituisaun públiku ida ne’ebé iha papel importante no estratéjiku tanba halo parte ba karakter building.

Nia lori Ministériu Interiór nia naran kompromete sei tenta inkoorpora valore sira ne’ebé Centro Chega! iha hodi implementa ba iha formasaun setór seguransa, tanba Ministériu Interiór komunga poliísia komunitária. Polisia ida ne’ebé tenta evita uza forsa no fízika iha sira nia intervensaun no atuasaun.

“Ami hanoin katak saida mak Centro Chega! iha tenke transmite ba instituisaun hotu-hotu halo parte kultura ida tanba ita hakarak tinan 10 no 20 mai oin, Timor-Leste ida respeitu direitus umanus, respeita ema nia integridade, dame nain iha espiritu patriotizmu no nasionalizmu kontribui ba dezenvolvimentu  ba ben estar seguransa”, nia esplika.

Enkuantu, Reprezentante AJAR, Inocencio de J. Xavier agradese ba Centro Chega! ba inisiativa ida ne’e hodi konvida AJAR envolve iha diskusaun hodi bele fó nia hanoin liu husi identifika progresu, dezafius no oportunidade atu bele mellora servisu di’ak liu tan iha futuru.

Entertantu rezultadu husi workshop ne’e konsege produz isu estratéjiku 6 hodi sai baze ba elabroasaun planu estratéjia ba Centro Chega! iha tinan 2021 to’o 2025.




Leave a Reply

Your email address will not be published. Required fields are marked *

error: Alert: Chega! Area Protejidu!
X