Centro Chega! Aprezenta Esbosu Dezeñu Memoriál Proklamadór ba Prezidente Repúblika

7

Dili, loron  14 Outubru 2020, Centro Nacional Chega! lidera husi Diretór Ezekutivu Sr. Hugo Maria Fernandes ho Ekipa, hamutuk ho Dezenadór Sr. Abel Fernandes halo aprezentasaun Esbosu Dezeñu Memoriál Proklamadór ne’ebé atu estabelese iha Palasiu Nobre Lahane – Dili ba S.E Prezidente Repúblika Dr. Francisco Guterres ‘Lú-Olo’ iha Palasiu Prezidensial Aitarak-Laran – Dili.

Dezeñu ba Memoriál Praklamadór ne’e realiza liu husi kooperasaun entre Gabinete Prezidente Repúblika ho Centro Nacional Chega!I.P, tuir konsultasaun ne’ebé halo entre parte rua kuaze fulan 3 nia laran, no ohin esbosu finál ne’e aprezenta ba Prezidente Repúblika atu foti desizaun, nune’e bele halo konstrusaun.

Iha dezeñu modellu 5 ne’ebé aprezenta ba S.E Prezidente Repúblika, konstrusaun iha Zona A ho Bustu Primeiru Prezidente no Proklamadór RDTL Saudozu Francisco Xavier do Amaral no Primeiru Ministru Saudozu Nicolau dos Reis Lobato, no iha Zona B no C ho Bustu membru Governu sira ne’ebé simu pose iha 29 Novembru 1975 iha Palasiu Nobre Lahane – Dili, hafoin Proklamasaun Independénsia 28 Novembru 1975.

Prezidente Repúblika Dr. Francisco Guterres ‘Lú-Olo’ rasik hafoin aprezentasaun hato’o laran haksolok no intersante tebes ho Esbosu Dezeñu 5 ne’ebé Centro Chega! aprezenta, no hateten katak, iha tempu badak sei halo desizaun, nune’e bele halo konstrusaun.

Entretantu, Memoriál Proklamadór iha Palasiu Nobre ne’e estabelese ho objetivu, fó rekoñesimentu públiku ba Proklamadór sira RDTL nian, no memoriál ne’e sei sai fatin komemorasaun públiku, fatin hato’o solidariedade ba ema seluk, fatin reflesaun hodi aprende husi pasadu no fatin ba destinasaun turizmu istóriku.




Leave a Reply

Your email address will not be published. Required fields are marked *

error: Alert: Chega! Area Protejidu!
X