Centro Chega! Apoiu Osan Hamutuk $ 32,400.00 ba Asosiasaun Vítima

115

Dili- iha loron Kinta-feira, 17 Fevereru 2022, Centro Nacional Chega!I.P lidera husi Diretór Ezekutivu, Hugo Maria Fernandes akompaña husi Fiskal Uniku, Diretora no Xefe Departementu sira asina akordu servisu hamutuk ho Asosiasaun Vítima Konflitu Polítiku 1974-1999.

Objetivu husi Asina akordu ne’e, atu apoiu osan subvensaun hamutuk $ 32,400.00 (Dollar Amerikanu rihun tolu nulu resin rua, atus haat) ba Asosiasaun Vítima Konflitu Polítiku 1974-1999 ba realiza atividade komemorasaun eventu istóriku iha munisípiu 12 inklui RAEOA.

Diretór Ezekutivu, Hugo informa akordu servisu hamutuk entre Centro Chega! ho Asosiasaun Vítima komesa ona iha tinan 2019. Iha tinan 2020 no 2021 ita asina akordu ho sira hodi implementa programa reparasaun. Iha tinan ida ne’e (2022), ita asina tan akordu ho sira hodi realiza atividade komemorasaun eventu istóriku liu-liu komemorasaun masakre sira ne’ebé akontese iha periodu 1975-1999.

“Ohin ita selebra tan parseria ida ne’e, sei la’o ba tinan 2022 nian. Ho apoiu ne’ebé Centro Chega! atribui ba Asosiasaun Vítima bele tulun servisu”, dehan Hugo iha sala Gabinete Diretór Ezekutivu Centro Chega!, Antigu Comarca Balide Dili.

Nia haktuir, tinan-tinan Centro Chega! sempre apoiu osan subvensaun ba Asosiasaun Vítima Konflitu Polítiku 1974-1999 tanba tuir rekomendasaun husi Relatóriu Chega! no Relatóriu Per Memoriam Ad Spem maioria iha relasaun ho apoiu sobrevivente ne’ebé mukit liu.

Nia esplika,  “ida ne’e ba tinan tolu Centro Chega! parseiru di’ak ho Asosiasaun Vítima no ami kontinua maske neineik, maibé iha intensaun ida hamenus no bele hakmaan sofrementu ne’ebé mak sobrevivente enfrenta durante tinan 24 nia laran iha periodu konflitu, no tinan 20 ona ita ukun-an, vítima no sovrevivente konflitu polítikuu pasadu seidauk hetan atensaun maximu”.

Koodenadór Asosiasaun Vítima Konflitu Polítiku 1974-1999, Domingos P. de Araujo Moniz agradese Centro Chega! ba apoiu ne’ebé fó ba asosiasaun vítima no promete sei ezekuta osan tuir regra no tempu ne’ebé determina.

“Lori Diresaun Nasionál nia naran hato’o agradese wain ba Diretór Ezekutivu Centro Chega! ho estrutura tomak ne’ebé mak durante ne’e esforsu no tau forsa hamutuk hodi hanoin ba sobrevivente mak durante ne’e hetan sofrementu”, nia agradese.

Maske ho prosesu ne’ebé naruk maibé hotuhotu nia hanoin di’ak oinsá ita dezenvolve ita nia nasaun ita nia povu no kore-an husi libertasaun.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X