Autoridade Lokál Promete Sei Promove Servisu Centro Chega! Iha Baze

20

Cailaco – Autoridade lokál Postu Administrativu Cailaco, Munisipiu Bobonaro promete sei promove servisu Centro Nacional Chega!I.P iha baze liuhusi atividade fahe informasaun ba komunidade sira.

Lia hirak ne’e, hato’o husi Xefe Suku Atudara, Manuel Ximenes ba jornalista sira iha Postu Administrativu Cailaco, Munisipiu Bobonaro hafoin partisipa atividade diseminasaun informasaun kona-ba papél Centro Chega! ba implementasaun rekomendasaun sira husi relatoriu Chega! no CVA ba komunidade Cailaco.

Nia hatutan, hakarak fahe informasaun servisu Centro Chega! nian ba komunidade sira iha baze tanba komunidade sira iha suku no aldeia seidauk hatene informasaun kona-ba Chega! liu-liu liafuan Chega! hateten katak to’o ona, para ona ba violensia labele repete-tán istória pasadu.

Razaun hatutan informasaun kona-ba Chega! ba komunidade sira tanba servisu sira ne’ebé Centro Chega! halo ne’e importante no servisu ne’ebé Chega! halo, hatutan servisu Comisaun Amizade Verdade e Rekonsiliasaun (CAVR) no Comisaun Lia Los no Amizade (CVA) nian liu-liu ba asuntu rekonsiliasaun.

Nia haktuir-tán durante mandatu CAVR mai halo ona rekonsiliasaun iha postu Cailaco. Ohin Centro Chega! mai hodi disemina informasaun kona-ba papel Chega! liga ba implementasaun rekomendasaun sira husi relatóriu Chega! no CVA nomós istória pasadu luta povu Timor-leste nian ba ukun rasik-an.

“Ami prontu koopera ho Centro Nasional Chega!. Ami fo apoiu maximu ba programa ne’e. Hatutan informasaun no istória ne’ebé detallu. Ami mos apoiu programa inan feto sira ne’ebé sai vítima ba violénsia passadu,” dehan Xefe Suku Atudara iha Postu Cailaco, Kuarta-feira, (14/09/ 2022).

Iha fatin hanesan, Administradór Postu Administrativu Cailaco, Alfredo Meta-Dau informa, nia apresia servisu Centro Chega! tanba disemina ona informasaun kona-ba istória pasadu no papél Chega! nian ba komunidade sira iha postu Cailaco.

Ho atividade diseminasaun ne’e, Administradór rekomenda ba Centro Chega! atu kontinua atividade hanesan ba komunidade sira iha suku tanba komunidade barak mak seidauk hetan informasaun kona-ba Chega!.

Nia afirma-tán, programa ne’e di’ak no ba oin, nia sei kontaktu ho Centro Chega! atu realiza nafatin atividade Chega! nian liliu halo peskiza kona-ba akontesimentu sira liga ho istoría Cailaco tanba Cailaco nu’udar fatin istóriku luta ba libertasaun patria.

Exemplu ida mak akonesimentu Masakre Cailaco, 12 Abríl 1999 kuaze ema sanulu resin mak mate iha momentu ne’ebá, maibé to’o agora seidauk iha entidade ruma ne’ebé halo peskiza ba masakre ne’e.

Iha biban ne’e, Diretór Divizaun Relasaun Externa, Komunidasaun Advokasia (DREKA), Gaudencio Soares Souza husu ba komunidade sira atu apoiu servisu Centro Chega! ba implementasaun rekomendasaun sira husi relatóriu Chega! no CVA. Nomós husu komunidade sira Postu Cailaco atu hakerek sira nia istória pasadu atu husik hela ba jerasaun foun aprende.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X