Asasinatu ba Bernadinho J.A. Guterres iha Kuluhun – 1999

120

Durante periodu kampaña ba Konsulta Populár ne’ebé hahú husi loron 14 -27 Agostu 1999, mosu insidente barak, inklui asasinatu ba ativista pro-independénsia sira, estudante no lider sira ne’ebé halo kampaña nakloke ba Independénsia nian. Iha loron ikus kampaña husi parte Pro-Autonomia nian iha loron 26 Agostu 1999, sira halo kampaña bo’ot iha Dili laran tomak. Sira halo atakes no sunu edefisiu sira iha Dili laran no hakanek jornalista na’in rua no hamate ema na’in 8, inklui insidente  ne’ebé akontese iha Kuluhun.

Insidente iha Kuluhun akontese bainhira grupu Pro-Autonomia nian liu husi ponte Kuluhun nian, no grupu juventude husi Pro-Independénsia komesa tuda sira ho fatuk no sona kanek membru ida husi Pro-Autonomia ho naran Marcus. Hafoin akontese konfrontu, iha tuku 03:00 lokraik, membru husi Unidade Polisia Brimob (Brigade Mobile) hahú tiru grupu Pro-Independénsia sira iha Kulukun.

Husi aktu tiru ne’e hamate juventude na’in 4, inklui Bernadinho Joaquim Afonso Guterres ne’ebé hanesan estudante universitáriu iha Universidade Satya Wacana, Salatiga – Indonézia, ne’ebé fila mai Timor atu tuir Konsulta Populár iha 30 Agostu 1999. Membru Brimob sira tiru mate Bernadinho iha estrada besik kruzamentu Kuluhun nian iha Loja Virgo nia sorin. Alende ne’e, sira mós oho joventude na’in tolu seluk hanesan Adelino de Jesus da Silva (tinan 23), Virgilio da Costa Rodrigues “Azildo” (tinan 26) no Atanazio Moniz de Jesus “Ameta” (tinan 23). Referensia husi Relatóriu Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X