“ALI” Entrega Biográfia Saudoso Komandante João Silvestre Nian ba CNC

44

Dili – (Loron Segunda-feira, 18 Jullu 2022), Eis Prizoneiru Politiku Munisipiu Lautem, Faustino Almeida kodigu Ami Luta ba Independensia  “ALI” entrega dokumentus saudoso Komandante, João Silvestre Branco nian ba Centro Nacional Chega!I.P. Dokumentus ne’e, simu direita hosi Xefe Departamentu Peskiza Istóriku, Nolasco Mendes iha edifisiu Centro Chega! Antigu Comarca Balide Dili.

Eis prizoneiru ne’e esplika, dokumentu ne’ebé entrega mak fotografia, karta apelu no biográfia saudoso Komadante, João Silvestre Branco nian ba Centro Chega!, hodi rai iha arkivu Centro Chega! nian, nune’e publiku bele asesu.

“Ohin hau entrega dokumentus apelu ne’ebé mak saudosu Komandante, João Silvestre Branco halo iha momentu rezisténsia iha ailaran soe liuhosi helikoptru. Depois ita nia maluk sira hili no entrega mai hau. Ida biográfia, ida fali mak fotografia rasik”, Responsavel ASEPPOL Munisipiu Lautem informa.

Tuir nia, razaun fundamental hakarak atu entrega dokumentus ne’e, ba Centro Chega! tanba, tuir nia hanoin, “dokumentus hirak ne’e nudar eransa di’ak ida atu joven sira bele haree, bele hatene no bele lee nomos bele akompaña, saida mak ami katuas sira halo ba rai doben ida ne’e hodi hetan independénsia”.

Faustino konta tuir, iha fulan Novembru 1978, matebian rahun saudoso Komandante, João Silvestre Branco hamutuk ho nia elementu sira evakua hosi foho matebian no halo embuskada no sira oho militar Indonézia batalaun 305 sira hamutuk ema na’in 700 resin.

Nune’e, iha tinan 1979 saudoso Komandante, João Silvestre Branco ho nia elementu sira hamutuk 32  militar Indonézia oho iha munisipiu Viqueque.

Enkuantu, Xefe Departamentu Peskiza Istóriku, Nolasco Mendes agradese ba Eis Prisoneiru Politiku Munisipiu Lautem, Faustino Almeida kodigu “ALI” tanba fo ona fiar ba Centro Chega! hodi entrega dokumentus saudoso Komandante, João Silvestre Branco nian ba CNC hodi rai iha arkivu.

Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.

Media Chega!




Leave a Reply

Your email address will not be published. Required fields are marked *

error: Alert: Chega! Area Protejidu!
X